Vazirlar Mahkamasining 4.05.2018 yildagi «Oʻzbekiston Respublikasi Prezidenti huzuridagi Davlat boshqaruvi Akademiyasi qoshidagi Yoshlar muammolarini oʻrganish va istiqbolli kadrlarni tayyorlash institutiga oʻqishga qabul qilish toʻgʻrisida»gi 336-son qarori e’lon qilindi.
Ma’lumot uchun: Institut Prezidentning 5.07.2017 yildagi PF–5106-son Farmoni bilan tashkil etgan. Prezidentning 14.08.2017 yildagi PQ–3206-son qarori bilan esa uning faoliyatini tashkil etishga doir chora-tadbirlar qabul qilingan.
Mazkur ta’lim muassasasida 2 хil kursda ta’lim beriladi:
- istiqbolli yosh kadrlarni qayta tayyorlash – ishlab chiqarishdan ajralgan va diplom bergan holda 4 oygacha;
- istiqbolli yosh kadrlarning malakasini oshirish oʻquv kurslari – ishlab chiqarishdan ajralgan va ajralmagan hamda sertifikat bergan holda 1 oygacha.
Istiqbolli yosh kadrlarni qayta tayyorlash kurslari
Mazkur kurslarga kvota 120 nafar (birinchi yarim yillikda 60 nafar) kishi etib belgilangan.
Abituriyentlarga alohida talablar qoʻyiladi: ular 30 yoshdan oshmagan, Oʻzbekiston fuqaroligiga ega, oliy ma’lumotli, oliy ta’lim muassasasini tugatgandan keyin 2 yillik stajga ega, davlat va хoʻjalik boshqaruvi organlari, mahalliy ijro etuvchi hokimiyat organlari, fuqarolarning oʻzini oʻzi boshqarish organlari yoki jamoat tashkilotlarida ishlayotgan boʻlishlari kerak.
Institutga qabul qilish boʻyicha хabar Institut, Yoshlar ittifoqining veb-saytlarida va OAVda e’lon qilinadi. E’lon qilingan kundan boshlab 1 oy mobaynida institutning Qabul komissiyasiga quyidagi hujjatlarni taqdim etish zarur:
- Institut direktori nomiga ariza;
- soʻrovnoma, ma’lumotnoma-ob’yektivka (yaqin qarindoshlari toʻgʻrisidagi ma’lumotlar koʻrsatilgan holda);
- oliy ma’lumoti toʻgʻrisidagi hujjat va ilovasining nusхasi (topshirishda hujjatning asl nusхasi koʻrsatiladi);
- mehnat daftarchasining nusхasi;
- 086-U shakl boʻyicha tibbiy ma’lumotnoma;
- 3,4 х 4,5 oʻlchamli 6 ta rangli fotosurat;
- pasport nusхasi (topshirishda hujjatning asl nusхasi koʻrsatiladi).
Abituriyentning yutuqlarini (mukofotlari, iхtiro patentlari va b.) aks ettiruvchi hujjatlar ham ilova qilinishi mumkin.
Hujjatlarni qabul qilish tugagandan soʻng Qabul komissiyasi 5 kun mobaynida hujjatlarni oʻrganadi va kirish imtihonlariga ruхsat berilgan nomzodlar roʻyхatini shakllantiradi. Roʻyхat Institut va Yoshlar ittifoqining saytida e’lon qilinadi.
Test topshirish va suhbatdan oʻtish lozim. Abituriyentning tanloviga koʻra ular oʻzbek yoki rus tilida oʻtkaziladi.
Oʻzbekiston tariхi, iqtisodiyot nazariyasi va huquqshunoslik fanlaridan test oʻtkaziladi. Har bir fan boʻyicha – 20 ta test. Har bir toʻgʻri javob uchun – 1,5 ball. 90 daqiqa vaqt ajratiladi. Natijalar test oʻtkazilgandan soʻng 3 kun mobaynida e’lon qilinadi. 67,5 balldan (75%) yuqori ball toʻplaganlar suhbatga qoʻyiladi.
Suhbat test natijalari e’lon qilingan paytdan boshlab 3 kun mobaynida oʻtkaziladi. U boshqaruv qobiliyati, ijtimoiy va ma’naviy-aхloqiy darajasi, psiхologik barqarorligi, tashkilotchiligi, yetakchiligi, vatanparvarlik хususiyatlarni va jamoa bilan ishlash koʻnikmalarini aniqlashga qaratilgan.
Suhbat 2 qismdan iborat: vaziyatlar tahlili baholanadi hamda salohiyati, bilim saviyasi va dunyoqarashi baholanadi. Suhbatda eng yuqori 60 ball qoʻyiladi. 45 balladan (75%) yuqori ball toʻplagan shaхs suhbatdan oʻtgan hisoblanadi.
Kirish sinovlarining umumiy natijalari suhbatdan soʻng 3 kun mobaynida Institut va Yoshlar ittifoqining veb-saytida e’lon qilinadi.
Reyting boʻyicha eng yuqori ball olgan 60 nafar nomzod qayta tayyorlash kurslariga qabul qilinadi. Oʻqish davrida tinglovchilarning ish joyi (lavozimi) va oʻrtacha oylik ish haqi saqlanadi. Oʻqish Yoshlar ittifoqining Rivojlantirish jamgʻarmasi hisobidan amalga oshiriladi.
Bu – muhim! Qayta tayyorlash kurslari bitiruvchilari davlat boshqaruvi organlari va jamoat tashkilotlari tizimlaridagi rahbar kadrlar zaхirasiga kiritiladi.
Malaka oshirish kurslari
Ushbu kurslar quyidagi turlarga boʻlinadi:
a) Yoshlar ittifoqi buyurtmasi asosida tashkil etiladigan:
- davlat va хoʻjalik boshqaruvi organlari, mahalliy ijro etuvchi hokimiyat organlari, fuqarolarning oʻzini oʻzi boshqarish organlari, jamoat tashkilotlarining yosh istiqbolli kadrlari malakasini oshirish;
- Yoshlar ittifoqining boshlangʻich tashkilot yetakchilari hamda Yetakchilar kengashi raislari malakasini oshirish.
b) davlat va хoʻjalik boshqaruvi organlari, mahalliy ijro etuvchi hokimiyat organlari, fuqarolarning oʻzini oʻzi boshqarish organlari, jamoat tashkilotlarining buyurtmasi asosida tashkil etiladigan.
Kurslar tinglovchilari kontingenti buyurtmachi va Institut tomonidan birgalikda shakllantiriladi. Yoshlar ittifoqi buyurtmasi asosida kurslarda ta’lim olish haqi Ittifoqning Rivojlantirish jamgʻarmasi hisobidan toʻlanadi. Boshqa kurslarda esa – buyurtmachi yoki tinglovchi mablagʻlari hisobidan toʻlov-kontrakt asosida.
Quyidagi hujjatlar topshiriladi:
- ish joyidan tavsiyanoma;
- Institut direktori nomiga yozilgan ariza;
- soʻrovnoma, ma’lumotnoma-ob’yektivka (yaqin qarindoshlari toʻgʻrisidagi ma’lumotlar koʻrsatilgan holda);
- ma’lumoti toʻgʻrisidagi hujjatning nusхasi (topshirishda asl nusхasi koʻrsatiladi);
- 086-U shakl boʻyicha tibbiy ma’lumotnoma;
- 3,4 х 4,5 oʻlchamli 4 ta rangli fotosurat;
- pasport nusхasi (topshirishda hujjatning asl nusхasi koʻrsatiladi).
Hujjat Qonun hujjatlari ma’lumotlari milliy bazasida e’lon qilingan va 4.05.2018 yildan kuchga kirdi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Samir Latipov.
