Firibgarlar jiddiy jazolanadi

Endi firibgarlik, ya’ni aldash yoki ishonchni suiiste’mol qilish yoʻli bilan oʻzganing mulkini yoki oʻzganing mulkiga boʻlgan huquqni qoʻlga kiritish — EKIHning 50 baravaridan 100 baravarigacha miqdorda jarima yoki 2 yilgacha axloq tuzatish ishlari yoxud 1 yildan 3 yilgacha ozodlikni cheklash yo 3 yilgacha ozodlikdan mahrum qilish bilan jazolanadi.

Ancha miqdorda (100 dan 300 EKIHgacha) yoki bir guruh shaxslar tomonidan oldindan til biriktirib, shuningdek, kompyuter texnikasi vositalaridan foydalanib sodir etilgan firibgarlik EKIHning 100 baravaridan 300 baravarigacha miqdorda jarima yoki 3 yilgacha axloq tuzatish ishlari yoxud 3 yildan 5 yilgacha ozodlikni cheklash yo 3 yildan 5 yilgacha ozodlikdan mahrum qilish bilan jazolanadi.

Firibgarlik koʻp miqdorda (300 dan 500 EKIHgacha), takroran yoki xavfli retsidivist tomonidan, shuningdek, xizmat mavqeidan foydalanib sodir etilgan boʻlsa, yanada qattiqroq jazolanadi. Ushbu qilmishlar uchun: EKIHning 300 baravaridan 400 baravarigacha miqdorda jarima yoki 2 yildan 3 yilgacha axloq tuzatish ishlari yoxud muayyan huquqdan mahrum etilgan holda 5 yildan 8 yilgacha ozodlikdan mahrum qilish bilan jazolanadi.

Va, nihoyat, eng ogʻir — EKIHning 400 baravaridan 600 baravarigacha miqdorda jarima yoki 8 yildan 10 yilgacha ozodlikdan mahrum qilish — juda koʻp miqdorda (500 EKIH va undan koʻp), oʻta xavfli retsidivist tomonidan, uyushgan guruh tomonidan yoki uning manfaatlarini koʻzlab sodir etilgan firibgarlikka nisbatan qoʻllaniladi.

Bunda firibgarlik bilan yetkazilgan moddiy zararning oʻrni qoplangan taqdirda aybdorlarga nisbatan ozodlikni cheklash va ozodlikdan mahrum qilish tariqasidagi jazo qoʻllanmaydi.

Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» axborot-qidiruv tizimida tanishish mumkin.

Oleg ZAMANOV,

ekspertimiz.