2017 yil 8 sentyabrdagi PF-5185-son Prezident Farmoni bilan tasdiqlangan Oʻzbekiston Respublikasida Ma’muriy islohotlar konsepsiyasini samarali amalga oshirish boʻyicha “Yoʻl хaritasi”ning ijrosini ta’minlash maqsadida Vazirlar Mahkamasining 2017 yil 23 noyabrdagi 940-son qarori bilan Hududlarni ijtimoiy-iqtisodiy rivojlantirishning dolzarb masalalarini hal etishda fuqarolarning oʻzini oʻzi boshqarish organlari roli va faoliyati samaradorligini yanada oshirishga doir kompleks chora-tadbirlar dasturi tasdiqlandi.
Hujjatga koʻra Qoraqalpogʻiston Vazirlar Kengashi, viloyatlar, Toshkent shahri, tumanlar va shaharlar hokimliklari fuqarolarning oʻzini oʻzi boshqarish organlari bilan quyidagi yoʻnalishlar boʻyicha doimiy hamkorlik oʻrnatadi:
- hududlarni ijtimoiy-iqtisodiy rivojlantirish dasturlari va normativ-huquqiy hujjatlar loyihalarini ishlab chiqish hamda amalga oshirish;
- hududlarni obodonlashtirish, mahalla va XUMSh faoliyatidagi muammolarni aniqlash hamda hal etish boʻyicha tadbirlarni oʻtkazish;
- oilalarda ijtimoiy-ma’naviy muhitni oʻrganish va uning natijalariga koʻra aniqlangan muammolarni hal kilish yuzasidan ta’sirchan jamoatchilik nazoratini amalga oshirish;
- sogʻliqni saqlash, ta’lim va boshqa muassasalarning samarali faoliyat koʻrsatishini ta’minlash boʻyicha chora-tadbirlarni amalga oshirish yuzasidan jamoatchilik nazoratini olib borish;
- tadbirkorlik sub’yektlariga amaliy yordam koʻrsatish hamda yangi ish oʻrinlari yaratish boʻyicha kompleks chora-tadbirlarni amalga oshirish;
- tomorqa yerlardan maqsadli foydalanish, qishloq хoʻjaligi ishlab chiqarishini tashkil etishda fermer хoʻjaliklariga koʻmaklashish choralarini koʻrish;
- hududlarda huquqbuzarliklarni, ayniqsa voyaga yetmaganlar va yoshlar oʻrtasida huquqbuzarliklar profilaktikasiga doir ishlarni tashkil etish.
Hujjat 2017 yil 25 noyabrda kuchga kirdi.
Mazkur hujjatning matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Sardor JUMAShOV,
ekspert-yuristimiz.