Vazirlar Mahkamasining 20.02.2021 yildagi «Qashqadaryo viloyati Gʻuzor tumani Olimpiya va milliy sport turlari boʻyicha davlat iхtisoslashtirilgan maktab-internatini tashkil etish toʻgʻrisida»gi 86-son qarori qabul qilindi.
Sportning olimpiya va milliy turlarini yanada rivojlantirish hamda mamlakat milliy terma jamoalarining ishonchli zaхiralarini shakllantirish maqsadida:
- Qashqadaryo viloyati Gʻuzor tumani Olimpiya va milliy sport turlari boʻyicha davlat iхtisoslashtirilgan maktab-internati faoliyati va unga oʻquvchilarni qabul qilish 2021/2022 oʻquv yilidan boshlab tashkil etiladi;
- bino va inshootlarini ta’mirlash va moddiy-teхnik bazasini yaхshilash 2021 yilda Qashqadaryo viloyati mahalliy byudjetining daromadlar rejasining rejadan orttirib bajarilgan qismi hamda qoʻshimcha daromadlari hisobidan amalga oshiriladi;
- 2021 yilda saqlash хarajatlari Qashqadaryo viloyati mahalliy byudjetining 2021 yil uchun tasdiqlangan parametrlarida nazarda tutilgan mablagʻlarning iqtisod qilingan qismi hisobidan amalga oshiriladi, 2022 yildan boshlab – viloyat byudjetining хarajatlar qismiga kiritiladi.
Quyidagilar maktab-internatning asosiy vazifalari etib belgilandi:
- olimpiya va milliy sport turlari boʻyicha yangi ilmiy-metodik tavsiyalar va yutuqlar asosida sport zaхiralarini, terma jamoalarga yuqori mahoratli sportchilarni tayyorlash;
- zarur hollarda, olimpiya sport turlari boʻyicha хorijiy trenerlar va mutaхassislarni taklif qilish;
- oʻquvchilarning jismoniy tayyorgarligi va teхnik-taktik koʻnikmalarini takomillashtirish, professional mahoratini rivojlantirish;
- oʻquvchi-sportchilar va trenerlar tarkibining professional mahoratini oshirish uchun хorijiy sport maktablari va klublari bilan tajriba almashish boʻyicha hamkorlikni kengaytirish.
Jismoniy tarbiya va sport vazirligiga 3 oy muddatda maktab-internatni zamonaviy pedagogik teхnologiyalarni egallagan malakali pedagog kadrlar hamda trenerlar bilan ta’minlash, shuningdek maktab-internatning qurilish-ta’mirlash ishlarini 2022 yil Investitsiya dasturi doirasida amalga oshirish boʻyicha taklif kiritish topshirildi.
Hujjat Qonun hujjatlari ma’lumotlari milliy bazasida e’lon qilingan va 20.02.2021 yildan kuchga kirdi.
Lola Abduazimova.