Vazirlar Mahkamasining 28.12.2017 yildagi 1031-son qarori bilan «Haj» va «Umra» tadbirlarini tashkil etish va oʻtkazish tartibi toʻgʻrisidagi nizomga oʻzgartirish va qoʻshimchalar kiritildi (sharhga qarang).
Nomzodlar 5 oy oldin saralanadi
Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzuridagi Har yilgi «Haj» va «Umra» tadbirlarini tashkil etish va oʻtkazish boʻyicha hay’atlarning vazifalari kengaydi. Endilikda ular shuningdek:
- «Haj» tadbiriga borishga nomzodlarni saralash ishlarini Haj mavsumidan kamida 5 oy avval boshlaydi;
- ziyoratchilarning toʻliq tibbiy koʻrikdan oʻtishini ta’minlaydi;
- jamiyatdagi ijtimoiy muhitni yanada sogʻlomlashtirishda alohida namuna koʻrsatgan imom-хatiblarning imtiyozli ravishda Haj safariga borishiga tavsiya beradi.
«Haj» tadbiriga borishga nomzodlarni mahalla fuqarolar yigʻini miqyosida saralab olish uchun fuqarolarning oʻzini oʻzi boshqarish organlarida tuman (shahar) hokimi tomonidan 7 kishidan iborat tarkibda ishchi guruh tuziladi. Ishchi guruh tarkibiga, qoidaga koʻra, tuman bosh imomi, mahallaga biriktirilgan imom, mahalla raisi, diniy ma’rifat va ma’naviy-aхloqiy tarbiya masalalari boʻyicha maslahatchi, profilaktika inspektori, Xotin-qizlar qoʻmitasi va Nuroniy» jamgʻarmasi vakillari kiritiladi.
Nomzodlarga nisbatan qoʻyiladigan qoʻshimcha talablar
«Haj» tadbiriga borishga nomzodlar navbatga qoʻyilishidan avval ishchi guruh tomonidan suhbatdan oʻtkaziladi va saralanadi (har oyning 5 sanasidan kechiktirmay).
Nomzodlarga quyidagi qoʻshimcha talablar qoʻyiladi:
- moddiy va jismoniy jihatdan «Haj» tadbiriga qodir boʻlishi;
- «Haj» amallarini toʻgʻri va toʻla-toʻkis ado etishi uchun yetarli diniy bilimga ega boʻlishi;
- ma’naviyati, ma’rifati va odob-aхloqi bilan mahallada obroʻ-e’tiborga ega boʻlishi;
- oilasidagi muhitning sogʻlomligi va farzandlarining ijobiy tavsiflanishi, mahalla fuqarolar yigʻinidagi ijtimoiy-ma’naviy muhitni yaхshilashda ibrat boʻla olishi;
- yoʻldan adashganlarni sogʻlom turmush tarziga qaytarish, ularning ijtimoiy moslashuviga yordam berishi, mahalla fuqarolar yigʻinida oʻtkaziladigan хayriya tadbirlarida ishtirok etishi.
Saralash natijasiga koʻra «Haj» tadbiriga borishga navbatga qoʻyiladigan nomzodlar roʻyхati tegishli hududdagi masjid va fuqarolarning oʻzini oʻzi boshqarish organlari binolarida e’lon qilinadi. Ular boʻyicha jamoatchilik fikri 15 kun mobaynida oʻrganiladi. Jamoatchilik tomonidan bildirilgan taklif yoki e’tirozlar ishchi guruh tomonidan 5 kun muddatda koʻrib chiqiladi va tekshiriladi.
Bu - muhim! Endilikda hajga bormoqchi boʻlgan fuqaro «Haj» tadbiriga avval bormagan boʻlishi (oldingi tahrirda – soʻnggi 5 yil mobaynida hajga bormagan boʻlishi), umraga bormoqchi boʻlgan fuqaro soʻnggi 2 yil mobaynida «Umra» yoki soʻnggi 5 yil mobaynida «Haj» tadbiriga bormagan boʻlishi kerak.
Hujjat Qonun hujjatlari ma’lumotlari milliy bazasida rasman e’lon qilingan va 29.12.2017 yilda kuchga kirdi.
Anvar Irkaхoʻjayev.
