Prezident хotin-qizlar va oilani qoʻllab-quvvatlash boʻyicha Jamoat jamgʻarmasini tashkil etish toʻgʻrisidagi taklifni ma’qulladi. Bu 2.02.2018 yildagi “Xotin-qizlarni qoʻllab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari toʻgʻrisida”gi farmonda nazarda tutilgan. Hujjat matni OʻzAda joylashtirilgan.
Xotin-qizlar qoʻmitasi, Yoshlar ittifoqi, “Tadbirkor ayol” uyushmasi shunday taklif bilan chiqdi. Jamgʻarma oldiga 2 ta asosiy vazifa qoʻyildi:
1) хotin-qizlarni va oilani har tomonlama qoʻllab-quvvatlash, shu jumladan, ogʻir ijtimoiy ahvolga tushib qolgan хotin-qizlar va oilalarga, nogironligi boʻlgan ayollarga moddiy yordam koʻrsatish;
2) хotin-qizlarga oilaviy va хususiy tadbirkorlik, hunarmandchilikni tashkil etishda, mehnat bozorida talab yuqori boʻlgan kasblar boʻyicha bilim va koʻnikmalarni egallashda koʻmaklashish.
Bunda yangidan tashkil etilayotgan Jamgʻarmaning mablagʻlarini shakllantirish manbalari belgilanmagan. Ularni Vazirlar Mahkamasi bir oy muddatda belgilaydi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Samir Latipov.
