Президент хотин-қизлар ва оилани қўллаб-қувватлаш бўйича Жамоат жамғармасини ташкил этиш тўғрисидаги таклифни маъқуллади. Бу 2.02.2018 йилдаги “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида”ги фармонда назарда тутилган. Ҳужжат матни ЎзАда жойлаштирилган.
Хотин-қизлар қўмитаси, Ёшлар иттифоқи, “Тадбиркор аёл” уюшмаси шундай таклиф билан чиқди. Жамғарма олдига 2 та асосий вазифа қўйилди:
1) хотин-қизларни ва оилани ҳар томонлама қўллаб-қувватлаш, шу жумладан, оғир ижтимоий аҳволга тушиб қолган хотин-қизлар ва оилаларга, ногиронлиги бўлган аёлларга моддий ёрдам кўрсатиш;
2) хотин-қизларга оилавий ва хусусий тадбиркорлик, ҳунармандчиликни ташкил этишда, меҳнат бозорида талаб юқори бўлган касблар бўйича билим ва кўникмаларни эгаллашда кўмаклашиш.
Бунда янгидан ташкил этилаётган Жамғарманинг маблағларини шакллантириш манбалари белгиланмаган. Уларни Вазирлар Маҳкамаси бир ой муддатда белгилайди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Самир Латипов.