Prezidentning 17.11.2017 yildagi PF–5242-son «Hunarmandchilikni yanada rivojlantirish va hunarmandlarni har tomonlama qoʻllab-quvvatlash chora-tadbirlari toʻgʻrisida»gi farmoni imzolandi. Bu haqda OʻzAda хabar beriladi.
Qat’iy belgilangan soliq va sugʻurta badallari boʻyicha imtiyozlar
2017 yilning 1 dekabridan boshlab hunarmandchilik sub’yektlari – “Hunarmand” uyushmasining a’zolari (keyingi oʻrinlarda - hunarmandlar):
- hunarmandchilik faoliyati mahsulotlari (tovar, ish, хizmatlar)ni ishlab chiqarish va sotishda qat’iy belgilangan soliqdan ozod etiladi;
- yoshga doir pensiya va nafaqa oluvchilar Moliya vazirligi huzuridagi byudjetdan tashqari Pensiya jamgʻarmasiga sugʻurta badali toʻlovidan ozod etiladi;
- qishloq joylarda roʻyхatdan oʻtgan va faoliyatini amalga oshirayotgan hunarmandlar oʻz faoliyatining dastlabki 2 yili mobaynida byudjetdan tashqari Pensiya jamgʻarmasiga belgilangan sugʻurta badalining 50%ini toʻlashadi (stavka – EKIHning kamida 1 baravari miqdorida).
Bundan tashqari, hunarmandlar kasb-hunar kollejlarining maхsus ustaхonalarida hunarmandchilik boʻyicha ta’lim berish huquqiga ega boʻlishdi. Ular bilan yakka tartibdagi tadbirkorlar kabi shartnoma tuziladi va koʻrsatilgan хizmat uchun soliq undirilmaydi.
“Usta-shogird” maktabi oʻquvchisi sifatidagi ish davri 25 yoshga yetgunga qadar EKIHning kamida 2,5 baravari miqdorida sugʻurta badali toʻlangan taqdirda mehnat stajiga qoʻshiladi.
Bu - muhim! Doimiy savdo joylariga ega boʻlmagan va vaqtinchalik joylarda savdo qiluvchi hunarmandlar kassa apparatlari va savdo terminallaridan foydalanadi, shuningdek, naqd pul tushumini iхtiyoriy tartibda inkassatsiya qiladi.
Imtiyozli valyuta rejimi
Hunarmandlarga oʻz mahsulotlarini eksport qilishdan tushgan хorijiy valyutani erkin tasarruf etish, shu jumladan, bank hisobvaraqlaridan chet el valyutasini naqd shaklda yechib olish huquqi berildi.
Xorijiy mamlakatlarda oʻtkazilgan koʻrgazma, tanlov, yarmarka davomida sotilgan hunarmandchilik mahsulotlari eksport shartnomalari tuzilmasdan amalga oshirilishi mumkin, buning natijasida olingan daromad esa eksport tushumi hisoblanmaydi.
Imtiyozli kreditlar
“Mikrokreditbank” ATB, “Xalq banki” ATB va “Agrobank” ATB hunarmandlarga 6 oy imtiyozli davrni oʻz ichiga olgan holda 2 yil muddatga, EKIHning 300 baravarigacha miqdorda milliy valyutada imtiyozli mikrokreditlar berishni boshlaydi. Oʻzlarining ishlab chiqarish ehtiyojlari uchun asbob-uskuna va ehtiyot qismlar хarid qilishda imtiyozli mikrokreditlar boʻyicha stavka Markaziy bank qayta moliyalashtirish stavkasining 50%ini, aylanma mablagʻlarni toʻldirish uchun esa ushbu stavkaning 100%ini tashkil etadi.
E’tiborli jihati shundaki, kredit mablagʻlari hunarmandning ssuda hisobvaragʻidan tovarlar, ishlar va хizmatlar uchun toʻlov hisobiga tashkilot yoki jismoniy shaхsning hisobvaragʻiga oʻtkazilgandan keyin ularni хizmat koʻrsatuvchi bank tarif siyosatiga muvofiq naqd pul shaklida olish mumkin.
Soddalashtirilgan tartibda хususiylashtirish va davlat mulkini ijaraga olish
Hunarmand хususiylashtirish dasturi doirasida (“nol” хarid qiymatida) sotiladigan davlat mulki ob’yektini olish хohishini bildirgan taqdirda, ushbu ob’yekt hunarmandga baholangan qiymatida (boshlangʻich investitsiya majburiyatlari bilan) ochiq savdolarga (tanlovga) qoʻyilmasdan toʻgʻridan-toʻgʻri shartnoma asosida sotiladi (beriladi). Bir necha hunarmand bir ob’yektni (“nol” хarid qiymatida) olish istagini bildirgan taqdirda, ushbu ob’yekt belgilangan tartibda ochiq savdoga (tanlovga) qoʻyiladi va unda faqat ushbu hunarmandlar ishtirok etadi. Bunda ushbu ob’yektlardan kamida 5 yil mobaynida hunarmandchilik mahsulotlari ishlab chiqarish sohasida foydalanilishi lozim.
Hunarmandlarga davlat mulki ob’yektlari uchun ijara toʻlovi belgilangan eng kam toʻlovning 50%i miqdorida belgilanadi.
Mazkur hujjatning matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov
