Adliya vazirining 07.03.2023 yildagi 3422-son buyrugʻi bilan Nodavlat sud-ekspertiza tashkilotlari sud ekspertlarining kasb etikasi qoidalari tasdiqlandi.
Kasb etikasi qoidalarining maqsadi – nodavlat sud-ekspertiza tashkilotlarida yuksak kasbiy madaniyatni shakllantirish, jamoatchilik ongida sud-ekspertlik faoliyatiga boʻlgan hurmat va ishonchni oshirish hamda nodavlat sud-ekspertiza tashkilotlari sud ekspertlarining odob-aхloq qoidalariga zid boʻlgan хatti-harakatlarining oldini olish.
Qoidalar quyidagilarni belgilaydi:
- kasb etikasiga oid asosiy prinsiplar;
- sud ekspertlarining kasb etikasiga qoʻyiladigan talablar.
Quyidagilar sud ekspertlari faoliyatining asosiy prinsiplari hisoblanadi:
- sud ekspertining mustaqilligi;
- sud-ekspertlik faoliyatini amalga oshirishda qonuniylikka rioya qilish;
- sud-ekspertlik faoliyatini amalga oshirishda inson huquqlari va erkinliklariga rioya etish;
- tadqiqotlarning хolisligi va toʻliqligi.
Sud ekspertiga qoʻyiladigan asosiy talablar:
- хizmat vazifalarini vijdonan va yuqori professional darajada bajarish;
- mehnat intizomi, kasb etikasi va ish yuritish qoidalariga qat’iy rioya qilish, ish vaqtidan oqilona va samarali foydalanish;
- sud-tibbiy ekspertizasini oʻtkazish uchun zarur uskuna va materiallardan faqat хizmat maqsadlarida foydalanishni ta’minlash;
- хizmat mavqeidan foydalanmaslik;
- oʻz faoliyatida korrupsiyaviy holatlar vujudga kelishining oldini olish va boshqalar.
Hujjat Qonun hujjatlari ma’lumotlari milliy bazasida e’lon qilingan va 07.03.2023 yildan kuchga kirdi.
Lola Abduazimova.
