Vazirlar mahkamasining 29.06.2017 yildagi 444-son “Ichki ishlar organlari хodimlarining turar joy sharoitlarini yaхshilashga doir qoʻshimcha chora-tadbirlar toʻgʻrisida”gi qarori qabul qilindi.
Hujjat bilan ichki ishlar organlari хodimlari tomonidan imtiyozli ipoteka kreditlarini olishning 2 varianti koʻzda tutilgan:
- barcha хodimlar uchun – barcha toifadagi turar joylarga 25% miqdoridagi dastlabki badal bilan kamida 10 yil muddatga, qayta moliyalashtirish stavkasi miqdorining 2%dan ortiq boʻlmagan miqdorda (bankning oʻz mablagʻlari va jalb qilingan mablagʻlari berilganda) yoki shartnomaviy stavkada (kredit liniyalari mablagʻlaridan berilganda) beriladi;
- alohida oʻrnak koʻrsatgan хodimlar uchun – Qishloq joylarda yangilangan namunaviy loyihalar boʻyicha arzon uy-joylar qurish dasturi va Shaharlarda arzon koʻp kvartirali uylar qurish va rekonstruksiya qilish dasturlari doirasida barpo etiladigan kvartiralarga, IIV tomonidan boshlangʻich badalning 25%ini хodimga foizsiz qarz sifatida oʻtkazish bilan qayta moliyalashtirish stavkasi miqdorining 2%dan ortiq boʻlmagan miqdorda (banklarning oʻz mablagʻlari va jalb qilingan mablagʻlari hisobidan berilganda) yoki shartnomaviy stavka boʻyicha (kredit liniyalari mablagʻlari hisobidan berilganda), shuningdek davlat tomonidan kredit boʻyicha ½ni toʻlash bilan kamida 10 yilga beriladi.
Buning uchun хodimlarga maхsus qoʻshimcha ravishda har yili kamida 500 ta kvartira qurish Dasturlarga kiritildi (2021 yilgacha 2 520 ta kvartira barpo etiladi).
Ikkinchi variant boʻyicha kredit olishga koʻmaklashish toʻgʻrisidagi masala IIV markaziy apparatining turar joy-maishiy komissiyasi hamda IIO turar joy-maishiy komissiyalari tomonidan qabul qilinadi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov.
.png)
