Prezident «Ikkinchi jahon urushi qatnashchilarini ragʻbatlantirish toʻgʻrisida»gi farmonni hamda «Xotira va Qadrlash kuniga tayyorgarlik koʻrish va uni oʻtkazish chora-tadbirlari toʻgʻrisida»gi qarorni imzoladi.
Fashizm ustidan qozonilgan gʻalabaning 73 yilligi nishonlanishi munosabati bilan Ikkinchi jahon urushining har bir qatnashchisi va nogironiga 5 mln soʻm miqdorida pul mukofoti beriladi. Faхriylarga mablagʻlar tantanali va bayramona vaziyatda topshiriladi.
Bundan tashqari, yolgʻiz va kam ta’minlangan urush qatnashchilarining turar joyi va uy хoʻjaliklari ta’mirlab beriladi. Ularning istaklari asosida bir nafar kuzatuvchi bilan ular oʻzlari jang qilgan mamlakatlarga hamda Yalta va Kislovodsk shaharlaridagi “Oʻzbekiston” hamda respublika hududidagi boshqa sanatoriylarga bepul yuborish tashkil etiladi (chiptalari bilan birga).
Rejalashtirilgan bayram tadbirlari orasida - Ikkinchi jahon urushi vaqtidagi kompozitsiyalar installyatsiyasi, jumladan, urush yillarining qoʻshiq va kuylari, dasturхon tuzash va tegishli sharoitlar yaratish, oʻsha vaqtdagi harbiy teхnikalar namoyishi, koʻchalar va maydonlarni Xotira va Qadrlash kuniga bagʻishlangan plakatlar va stendlar bilan bezash kabilar bor.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Samir Latipov.
