Imtiyozli mablagʻlardan oʻz muddatida foydalanmadingizmi – qaytaring

Bugungi kunda soliq imtiyozlari qoʻllanganda boʻshagan, maqsadli foydalanish sharti bilan taqdim qilingan mablagʻlar faqat qonunchilik bilan belgilangan maqsadlar uchun sarflanishi mumkin. Bunday mablagʻlardan belgilanmagan maqsadda foydalanilgan taqdirda, ular penya hisoblangan holda byudjetga undirib olinadi (SKning 30-moddasi 4-qismi).

Amaliyotda imtiyozli soliq toʻlovchilarda imtiyoz berilgan davrda toʻliq hajmda belgilangan maqsadda foydalanilmagan mablagʻlar qoldiqlarini nima qilish kerak, degan savol tugʻiladi.

SKning 30-moddasiga kiritilishi taklif etilayotgan qoʻshimchalar imtiyoz muddati tugaganidan soʻng ulardan foydalanish tartibi va muddatlariga aniqlik kiritadi. Agar mazkur qoʻshimchalar qabul qilinadigan boʻlsa, soliq toʻlovchilar qoldiqlardan bir yil davomida belgilangan maqsadlarda foydalanishlari mumkin boʻladi. Agar bu muddat tugagandan keyin ham ulardan toʻliq foydalanilmasa, qolgan mablagʻlar byudjetga undirib olinadi.

Loyiha muhokama jarayonida boʻlib, u oʻzgartirilishi, qoʻshimchalar kiritilishi yoki rad etilishi mumkin.

Muzaffar MIRZAGʻANIYeV, 
ekspertimiz