Имтиёзли маблағлардан ўз муддатида фойдаланмадингизми – қайтаринг

Бугунги кунда солиқ имтиёзлари қўлланганда бўшаган, мақсадли фойдаланиш шарти билан тақдим қилинган маблағлар фақат қонунчилик билан белгиланган мақсадлар учун сарфланиши мумкин. Бундай маблағлардан белгиланмаган мақсадда фойдаланилган тақдирда, улар пеня ҳисобланган ҳолда бюджетга ундириб олинади (СКнинг 30-моддаси 4-қисми).

Амалиётда имтиёзли солиқ тўловчиларда имтиёз берилган даврда тўлиқ ҳажмда белгиланган мақсадда фойдаланилмаган маблағлар қолдиқларини нима қилиш керак, деган савол туғилади.

СКнинг 30-моддасига киритилиши таклиф этилаётган қўшимчалар имтиёз муддати тугаганидан сўнг улардан фойдаланиш тартиби ва муддатларига аниқлик киритади. Агар мазкур қўшимчалар қабул қилинадиган бўлса, солиқ тўловчилар қолдиқлардан бир йил давомида белгиланган мақсадларда фойдаланишлари мумкин бўлади. Агар бу муддат тугагандан кейин ҳам улардан тўлиқ фойдаланилмаса, қолган маблағлар бюджетга ундириб олинади.

Лойиҳа муҳокама жараёнида бўлиб, у ўзгартирилиши, қўшимчалар киритилиши ёки рад этилиши мумкин.

Музаффар МИРЗАҒАНИЕВ, 
экспертимиз