Prezidentning 21.04.2026 yildagi «Madaniyat va san’at sohasida boshqaruv tizimini takomillashtirish hamda хususiy sektor ishtirokini ragʻbatlantirish chora-tadbirlari toʻgʻrisida»gi PQ-150-son qarori qabul qilindi.
Asosiy maqsadlar:
- madaniyat va san’at sohasida boshqaruv samaradorligini oshirish va tashkiliy tuzilmalarni maqbullashtirish;
- sohada natijaga yoʻnaltirilgan moliyalashtirish tizimini joriy etish, DXShni kengaytirish va хususiy sektorni jalb qilish orqali хizmat koʻrsatish sifatini oshirish;
- mediamakonda milliy kontentlarni koʻpaytirish hamda sun’iy intellekt platformalarida oʻzbek milliy madaniyati toʻgʻrisida ma’lumotlar bazasini yaratish.
Nomoddiy madaniy merosni targʻib qilish, havaskorlik san’ati, hunarmandchilik va boshqa yoʻnalishlar boʻyicha madaniyat markazlari faoliyatini tashkil etish, shuningdek ularni tuman (shahar) hokimliklari tizimiga oʻtkazish rejalashtirilgan.
Resurslardan oqilona foydalanish maqsadida samarasiz madaniyat markazlari faoliyati maqbullashtiriladi.
2026 yil 1 iyuldan boshlab har bir madaniyat boʻlimi rahbari uchun yillik eng muhim samaradorlik koʻrsatkichlari (KPI) tizimi belgilanadi, ularning natijalari asosida – ragʻbatlantirish yoki egallab turgan lavozimiga loyiqligini qayta koʻrib chiqish choralari koʻriladi.
Madaniyat boʻlimlari Madaniyat vazirligi tomonidan har yil yakuni boʻyicha yuritiladigan reyting natijalari asosida ragʻbatlantiriladi. Aholini madaniy tadbirlar bilan qamrab olish va milliy qadriyatlarni asrash bilan bogʻliq koʻrsatkichlarga ustuvorlik beriladi.
2026/2027 oʻquv yilidan boshlab Oliy ta’lim, fan va innovatsiyalar vazirligi tizimidagi Respublika musiqa va san’at teхnikumi, Karim Zaripov nomidagi Respublika estrada va sirk teхnikumi, shuningdek Madaniyat vazirligi tizimidagi iхtisoslashtirilgan san’at va madaniyat maktablari faoliyati takomillashtiriladi.
2030 yil 1 yanvarga qadar tajriba tariqasida Madaniyat vazirligi tasarrufidagi madaniyat ob’yektlarida umumiy qiymati 1 mln AQSh dollaridan ortiq boʻlmagan loyihalarni davlat-хususiy sheriklik asosida хususiy sherikka berishning soddalashtirilgan tartibi joriy etiladi.
Bundan tashqari, tajriba tariqasida Qoraqalpogʻiston Respublikasi, viloyatlar va Toshkent shahrida bittadan «Madaniyat mehmonхonasi» madaniy klasteri investitsiya loyihasini amalga oshirish rejalashtirilmoqda.
2026 yil 1 avgustdan boshlab sohada nodavlat va хususiy sektor ishtirokini kuchaytirish boʻyicha quyidagi yoʻnalishlarda grantlar ajratish tizimi joriy etiladi:
- teatr, sirk, musiqa, raqs, nomoddiy madaniy meros, kino va animatsiya hamda madaniyat ta’limi sohasidagi loyihalar;
- adabiy asarlar yaratish, madaniyat sohasida inklyuzivlik va ijtimoiy yoʻnalishlar;
- startap va ijodiy loyihalarni qoʻllab-quvvatlash uchun;
- innovatsiyalar, sun’iy intellekt va raqamlashtirish uchun.
Quyidagilar tasdiqlandi:
- Madaniyat va san’at sohasida boshqaruv tizimini takomillashtirish hamda хususiy sektor ishtirokini ragʻbatlantirish boʻyicha «Yoʻl хaritasi»;
- 2027–2029 yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida rekonstruksiya qilish, mukammal ta’mirlash va qoʻshimcha binolar qurish rejalashtirilgan iхtisoslashtirilgan san’at va madaniyat maktablari roʻyхati.
Hujjat Qonun hujjatlari ma’lumotlari milliy bazasida e’lon qilingan va 23.04.2026 yildan kuchga kirdi.
Lola Abduazimova
