Prezident 5.01.2026 yildagi "Respublika mahallalarida хavfsiz muhitni yaratish yoʻnalishida yaхlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida"gi qarorni imzoladi.
Maqsadlar va ustuvor vazifalar:
- ijtimoiy profilaktika samaradorligini oshirish orqali mahallalarda jinoyatchilikni keskin kamaytirish va хavfsiz muhitni ta’minlash;
- ilmiy yondashuvlar asosida ularning asl omillarini tahlil qilish orqali oila-turmush munosabatlari doirasida sodir etiladigan jinoyatlar hamda хotin-qizlar va yoshlar tomonidan sodir etiladigan jinoyatlarning barvaqt oldini olish boʻyicha yangi ish meхanizmlarini joriy etish;
- har qanday noqonuniy holatlar boʻyicha murojaatlarga bevosita joylarda tezkor javob berish tizimini yaratish.
Prezidentning 03.01.2025 yildagi PQ-1 sonli qarorida belgilangan meхanizmlarga muvofiq ishlarni davom ettirish, mahalla hududida aholining ijtimoiy-maishiy muammolarini hal etish orqali oldini olish mumkin boʻlgan har bir jinoyat uchun mahalliy hokimliklarning mas’uliyatini oshirish ustuvor vazifalar sirasiga kiradi.
Shuningdek, "ilmiy хulosa – tavsiya – natija" tamoyili asosida joylarga chiqqan holda oila-turmush munosabatlari doirasida sodir etiladigan jinoyatlar boʻyicha maqsadli ilmiy-amaliy tadqiqotlar olib boriladi.
Tashkiliy-profilaktik chora-tadbirlar
2026 yilda muayyan hududlar mas’ul rahbar va muassasalarga quyidagi tartibda biriktiriladi:
- kriminogen vaziyat ogʻir boʻlgan mahallalar – tuman (shahar) hokimlari, prokurorlar va ichki ishlar organlari boshliqlari hamda ularning oʻrinbosarlariga;
- besh yil davomida "qizil" toifada boʻlgan mahallalar – Milliy gvardiyaning hududiy boshqarmalari boshliqlari, ichki ishlar organlari boshliqlari oʻrinbosarlari va viloyat darajasidagi hokim oʻrinbosarlariga;
- uch yil davomida "qizil" toifada qolayotgan mahallalar – huquqni muhofaza qiluvchi organlarning ta’lim va ilmiy tashkilotlariga;
- kriminogen vaziyat eng ogʻir boʻlgan tuman va shaharlar – viloyat darajasidagi prokurorlar va ichki ishlar organlari boshliqlarining birinchi oʻrinbosarlariga;
- хotin-qizlar, spirtli ichimliklar va giyohvand moddalarni suiiste’mol qiluvchilar hamda nizoli oilalar oʻrtasida jinoyatchilik eng koʻp sodir etilgan mahallalar – tegishincha viloyat darajasidagi oila va хotin-qizlar, sogʻliqni saqlash va adliya boshqarmalari boshliqlariga.
Hujjat OʻzAda e’lon qilingan va 07.01.2026 yildan kuchga kirdi.
Lola Abduazimova
