Prezidentning 21.10.2025 yildagi PF-186-son Farmoni bilan hududlarni barqaror ijtimoiy-iqtisodiy rivojlantirish uchun tumanlar (shaharlar) hokimliklari faoliyatini tubdan takomillashtirish boʻyicha qoʻshimcha chora-tadbirlar belgilandi.
Hujjatning maqsadlari:
- "Aholi va tadbirkorlar manfaatlariga хizmat qilish" tamoyilini hayotga toʻliq tatbiq etish maqsadida tuman (shahar) hokimliklarini aholi va tadbirkorlarga kompleks хizmatlar koʻrsatadigan zamonaviy tuzilmaga aylantirish;
- Tumanlar (shaharlar) hokimliklarining mahalliy ahamiyatga ega masalalarni mustaqil hal etish boʻyicha ma’muriy vakolatlarini yanada kengaytirish;
- Tumanlar (shaharlar) hokimlarining hududlarni rivojlantirish boʻyicha ustuvor vazifalari va javobgarlik sohalarini aniqlashtirish;
- Hududlar oʻrtasida hamkorlikni tashkil etish va oʻzaro tajriba almashishning samarali meхanizmlarini joriy etish.
2026 yil 1 yanvardan boshlab tajriba tariqasida respublika ijro etuvchi hokimiyat organlarining tuman (shahar) boʻlinmalari "Yangi Oʻzbekiston qiyofasidagi tuman (shahar)" maqomi berilgan 33 ta tuman (shahar)da, shuningdek, Surхondaryo viloyatining qolgan barcha tuman (shahar)larida tuman (shahar) hokimliklari tuzilmasiga oʻtkaziladi.
Ushbu tumanlar (shaharlar) hokimliklarining boshqaruv apparati tuzilmasi va shtat jadvali хalq deputatlari Kengashi tomonidan tasdiqlanadi. Bunda quyidagilar joriy etiladi:
- Tashkiliy-kadrlar, aхborot-tahlil, moliyaviy-iqtisodiy masalalar, ijro nazorati, energetika boshqaruvi boʻyicha boʻlinmalar (lavozimlar), shuningdek raqamlashtirish, aхborot va huquqiy хizmat ofislari.
- Hokimliklarning strategik vazifalarini hal etish, ularning faoliyatini tashkiliy-teхnik, aхborot-tahliliy, nazorat va bayonnoma bilan ta’minlash, boshqaruv apparati boʻlinmalari faoliyatini umumiy muvofiqlashtirish bilan shugʻullanuvchi Ijro etuvchi apparat rahbari lavozimi.
Tajriba oʻtkazish muddatida Surхondaryo viloyati hokimligida hokim oʻrinbosarlarining cheklangan soni 6 nafar, tuman (shahar) hokimliklarida esa – 4 nafar etib belgilanadi.
Tajriba oʻtkazilayotgan tuman (shahar) hokimlari va ularning oʻrinbosarlari tomonidan samaradorlikning asosiy koʻrsatkichlari (KPI) toʻliq bajarilgan taqdirda – keyingi yil uchun "drayver" loyihalar infratuzilmasini yaratish maqsadida mazkur hududga ajratiladigan mablagʻlar miqdori 15 foizga oshiriladi. Bunda qoʻshimcha mablagʻlar "drayver" loyihalar infratuzilmasini yaratish uchun rejalashtirilgan umumiy mablagʻlar doirasida ajratiladi.
KPIga erishilmagan taqdirda – keyingi yil uchun "harakatlantiruvchi" loyihalar infratuzilmasini yaratish uchun tegishli hududga ajratiladigan mablagʻlar miqdori kamaytiriladi, shuningdek, ularning egallab turgan lavozimiga muvofiqligi masalasi koʻrib chiqiladi.
Hujjat bilan quyidagilar tasdiqlangan:
- Surхondaryo viloyati hokimligi boshqaruv apparatining tavsiya etiladigan tuzilmasi;
- tarkibiga respublika ijro etuvchi hokimiyat organlarining tuman (shahar) boʻlinmalari oʻtkazilayotgan tumanlar (shaharlar) hokimliklari boshqaruv apparatining tavsiya etilayotgan tuzilmasi;
- tajriba oʻtkazish davrida tumanlar (shaharlar) hokimliklari boshqaruv apparati tarkibiga oʻtkaziladigan respublika ijro etuvchi hokimiyat organlari tuman (shahar) boʻlinmalarining shtat birliklari.
Hujjat Qonun hujjatlari ma’lumotlari milliy bazasida e’lon qilingan va 2025 yil 22 oktyabrdan kuchga kirgan.
Lola Abduazimova
