Президентнинг 21.10.2025 йилдаги ПФ-186-сон Фармони билан ҳудудларни барқарор ижтимоий-иқтисодий ривожлантириш учун туманлар (шаҳарлар) ҳокимликлари фаолиятини тубдан такомиллаштириш бўйича қўшимча чора-тадбирлар белгиланди.
Ҳужжатнинг мақсадлари:
- "Аҳоли ва тадбиркорлар манфаатларига хизмат қилиш" тамойилини ҳаётга тўлиқ татбиқ этиш мақсадида туман (шаҳар) ҳокимликларини аҳоли ва тадбиркорларга комплекс хизматлар кўрсатадиган замонавий тузилмага айлантириш;
- Туманлар (шаҳарлар) ҳокимликларининг маҳаллий аҳамиятга эга масалаларни мустақил ҳал этиш бўйича маъмурий ваколатларини янада кенгайтириш;
- Туманлар (шаҳарлар) ҳокимларининг ҳудудларни ривожлантириш бўйича устувор вазифалари ва жавобгарлик соҳаларини аниқлаштириш;
- Ҳудудлар ўртасида ҳамкорликни ташкил этиш ва ўзаро тажриба алмашишнинг самарали механизмларини жорий этиш.
2026 йил 1 январдан бошлаб тажриба тариқасида республика ижро этувчи ҳокимият органларининг туман (шаҳар) бўлинмалари "Янги Ўзбекистон қиёфасидаги туман (шаҳар)" мақоми берилган 33 та туман (шаҳар)да, шунингдек, Сурхондарё вилоятининг қолган барча туман (шаҳар)ларида туман (шаҳар) ҳокимликлари тузилмасига ўтказилади.
Ушбу туманлар (шаҳарлар) ҳокимликларининг бошқарув аппарати тузилмаси ва штат жадвали халқ депутатлари Кенгаши томонидан тасдиқланади. Бунда қуйидагилар жорий этилади:
- Ташкилий-кадрлар, ахборот-таҳлил, молиявий-иқтисодий масалалар, ижро назорати, энергетика бошқаруви бўйича бўлинмалар (лавозимлар), шунингдек рақамлаштириш, ахборот ва ҳуқуқий хизмат офислари.
- Ҳокимликларнинг стратегик вазифаларини ҳал этиш, уларнинг фаолиятини ташкилий-техник, ахборот-таҳлилий, назорат ва баённома билан таъминлаш, бошқарув аппарати бўлинмалари фаолиятини умумий мувофиқлаштириш билан шуғулланувчи Ижро этувчи аппарат раҳбари лавозими.
Тажриба ўтказиш муддатида Сурхондарё вилояти ҳокимлигида ҳоким ўринбосарларининг чекланган сони 6 нафар, туман (шаҳар) ҳокимликларида эса – 4 нафар этиб белгиланади.
Тажриба ўтказилаётган туман (шаҳар) ҳокимлари ва уларнинг ўринбосарлари томонидан самарадорликнинг асосий кўрсаткичлари (KPI) тўлиқ бажарилган тақдирда – кейинги йил учун "драйвер" лойиҳалар инфратузилмасини яратиш мақсадида мазкур ҳудудга ажратиладиган маблағлар миқдори 15 фоизга оширилади. Бунда қўшимча маблағлар "драйвер" лойиҳалар инфратузилмасини яратиш учун режалаштирилган умумий маблағлар доирасида ажратилади.
KPIга эришилмаган тақдирда – кейинги йил учун "ҳаракатлантирувчи" лойиҳалар инфратузилмасини яратиш учун тегишли ҳудудга ажратиладиган маблағлар миқдори камайтирилади, шунингдек, уларнинг эгаллаб турган лавозимига мувофиқлиги масаласи кўриб чиқилади.
Ҳужжат билан қуйидагилар тасдиқланган:
- Сурхондарё вилояти ҳокимлиги бошқарув аппаратининг тавсия этиладиган тузилмаси;
- таркибига республика ижро этувчи ҳокимият органларининг туман (шаҳар) бўлинмалари ўтказилаётган туманлар (шаҳарлар) ҳокимликлари бошқарув аппаратининг тавсия этилаётган тузилмаси;
- тажриба ўтказиш даврида туманлар (шаҳарлар) ҳокимликлари бошқарув аппарати таркибига ўтказиладиган республика ижро этувчи ҳокимият органлари туман (шаҳар) бўлинмаларининг штат бирликлари.
Ҳужжат Қонун ҳужжатлари маълумотлари миллий базасида эълон қилинган ва 2025 йил 22 октябрдан кучга кирган.
Лола Абдуазимова
