Adliya vazirining 07.02.2025 yildagi 3605-son buyrugʻi bilan Normativ-huquqiy hujjatlar ijrosini monitoringdan oʻtkazish tartibi toʻgʻrisidagi nizomi tasdiqlandi.
Hujjat Prezidentning 16.08.2024 yildagi "Ijtimoiy munosabatlarni huquqiy tartibga solishning barqarorligini ta’minlash, sifati va samaradorligini oshirish chora-tadbirlari toʻgʻrisida"gi PF-111-son Farmoniga muvofiq ishlab chiqilgan.
Normativ-huquqiy hujjatning amalga oshirilishi va natijalari ustidan muntazam va tizimli nazorat monitoring rejasi asosida amalga oshiriladi. U NHHni qabul qilish maqsadlarini, koʻrsatkichlarni, monitoring oʻtkazish davriyligini va uni oʻtkazish bilan bogʻliq boshqa talablarni belgilaydi.
Tadbirkorlik faoliyatiga, fuqarolarning huquqlari, erkinliklari va qonuniy manfaatlariga, shuningdek atrof-muhitga taalluqli NHHlarning ijrosi besh yil davomida, qonunosti hujjatlarining ijrosi esa – ular kuchga kirgan kundan boshlab uch yil davomida har yili majburiy nazorat qilinishi lozim.
Monitoring normativ-huquqiy hujjat bilan belgilangan davlat organi tomonidan, mas’ul organ belgilanmagan hollarda esa – tegishli sohada davlat siyosatini amalga oshiruvchi vazirliklar va idoralar tomonidan amalga oshiriladi.
U 15.03.2021 yildagi PQ-5025-son qarori bilan tasdiqlangan loyihalar va qabul qilingan NHHlarning tartibga solish ta’sirini baholash tartibiga muvofiq oʻtkaziladi. Monitoringning asosiy vazifalari:
- normativ-huquqiy hujjatni qabul qilish maqsadlariga erishishni ta’minlash;
- uning amalga oshirilishi va natijalarini tahlil qilish, muntazam va tizimli nazorat qilish;
- NHHning ta’sirini baholash uchun statistik ma’lumotlarni toʻplash;
- NHHni amalga oshirishni qiyinlashtiruvchi holatlarni aniqlash;
- hujjatni amalga oshirish amaliyotining uni qabul qilish maqsadlariga muvofiqligini oʻrganish.
Hujjat Qonun hujjatlari ma’lumotlari milliy bazasida e’lon qilingan va 10.02.2025 yildan kuchga kirdi.
Lola Abduazimova
