Prezident tomonidan 09.08.2023 yildagi “Normativ-huquqiy hujjatlarning va ular loyihalarining korrupsiyaga qarshi ekspertizasi toʻgʻrisida”gi OʻRQ-860-son Qonun imzolandi.
Qonun normativ-huquqiy hujjatlar va ular loyihalarining korrupsiyaga qarshi ekspertizasi sohasidagi munosabatlarni tartibga solishdan iborat.
Quyidagilar normativ-huquqiy hujjatlar va ular loyihalarining korrupsiyaga qarshi ekspertizasini oʻtkazuvchi sub’yektlar hisoblanadi:
- Korrupsiyaga qarshi kurashish agentligi;
- adliya organlari;
- normativ-huquqiy hujjatlar loyihalarini ishlab chiquvchi davlat organlari;
- tegishli normativ-huquqiy hujjatlar ijrosini ta’minlash vazifasi yuklatilgan davlat organlari va tashkilotlari.
Korrupsiyaga qarshi kurashish agentligi jamoatchilik e’tiborini tortgan va OAV hamda ijtimoiy tarmoqlarda turli muhokama va munozaralarga sabab boʻlgan normativ-huquqiy hujjatlar loyihalarini korrupsiyaga qarshi ekspertizadan oʻtkazishga haqli.
Korrupsiyaga qarshi ekspertizada jamoatchilik ishtiroki tartibi alohida belgilangan. Jumladan, NNT, fuqarolarning oʻzini oʻzi boshqarish organlari va OAV normativ-huquqiy hujjatlar loyihalarini korrupsiyaga qarshi jamoatchilik ekspertizasini oʻtkazib, korrupsiogen omillarni bartaraf etish haqida takliflar kiritish huquqiga ega.
Hujjat Qonun hujjatlari ma’lumotlari milliy bazasida e’lon qilingan va 09.08.2023 yildan kuchga kirdi.
Sobir Nurberdiyev.
