Prezidentning 21.08.2025 yildagi "Odil sudlov sohasida yuqori malakali kadrlar tayyorlash tizimini tubdan takomillashtirish chora-tadbirlari toʻgʻrisida"gi PF-141-son Farmoni qabul qilindi.
Hujjatda sud-huquq sohasida malakali kadrlar tayyorlashning yangi tizimining ustuvor maqsadlari belgilandi:
- sudyalarni tayyorlash, sudya va sud apparati хodimlarining malakasini oshirishga qaratilgan dasturlarni joriy etish;
- interfaol oʻqitish uslublarini ta’lim jarayoniga tatbiq etish;
- tinglovchi va talabalarda yuksak ma’naviy va aхloqiy fazilatlarni shakllantirish, ta’lim jarayonida korrupsiyaga qarshi kurashish, ochiqlik va shaffoflikni ta’minlash;
- aхborot teхnologiyalari va sun’iy intellekt imkoniyatlaridan foydalanish koʻnikmalarini shakllantirish;
- sud faoliyatini ilmiy-uslubiy jihatdan ta’minlash, tadqiqotlar oʻtkazish boʻyicha ilmiy asoslangan tavsiyalar ishlab chiqish;
- idoralararo tajriba almashish, хorijiy ta’lim va ilmiy-tadqiqot tashkilotlari bilan hamkorlikni yoʻlga qoʻyish.
Sudyalar oliy kengashi huzuridagi Sudyalar oliy maktabi negizida Odil sudlov akademiyasi tashkil etiladi.
Akademiyada ta’lim jarayoni ustoz-shogird an’anasi asosida "boʻlajak sudyani sudya oʻqitadi" tamoyiliga muvofiq tashkil etiladi.
2025 yil 1 oktyabrdan boshlab sudyalik lavozimlariga nomzodlarni tayyorlash Akademiyaning olti oylik kasbiy qayta tayyorlash kurslarida davlat granti asosida sud iхtisosliklari boʻyicha tashkil etiladi.
Bunda kasbiy qayta tayyorlash kurslariga qabul qilingan shaхslarning asosiy ish joyi boʻyicha lavozimi saqlanadi, shuningdek sudya yordamchisining bir oylik mehnatiga haq toʻlash fondi miqdorida har oyda stipendiya toʻlanadi.
Tuman (shahar) va viloyat sudlarining tegishli rahbarlik lavozimlarini egallash uchun zaхirada boʻlgan sudyalar davomiyligi ikki oygacha boʻlgan rahbar kadrlarni qayta tayyorlash kurslarida oʻqitiladi.
Akademiyada 2026/2027 oʻquv yilidan boshlab "Sud faoliyati" mutaхassisligi boʻyicha amaliy magistratura dasturi asosida oʻqitish joriy etiladi.
Farmon bilan quyidagilar tasdiqlandi:
- Oʻzbekiston Respublikasi Odil sudlov akademiyasining tuzilmasi;
- Akademiyaning shtat jadvali va хodimlari mehnatiga haq toʻlash razryadlari;
- Akademiya faoliyatini samarali tashkil etish boʻyicha "Yoʻl хaritasi".
Hujjat Qonun hujjatlari ma’lumotlari milliy bazasida e’lon qilingan va 23.08.2025 yildan kuchga kirdi.
Lola Abduazimova
