Prezidentning 20.01.2023 yildagi “Odamning immunitet tanqisligi virusi keltirib chiqaradigan kasallikka qarshi kurashish tizimini yanada kuchaytirish chora-tadbirlari toʻgʻrisida”gi PQ-14-son qarori qabul qilindi.
Hujjat bilan Aholi orasida OIV infeksiyasi tarqalishiga qarshi kurashish samaradorligini oshirishga doir 2023-2027 yillarga moʻljallangan kompleks chora-tadbirlar dasturi tasdiqlandi.
Birlashgan Millatlar Tashkilotining Bosh Assambleyasi tomonidan 2030 yilga borib OIV epidemiyasiga barham berish uchun "95-95-95" strategiyasi ilgari surilgan va uning doirasida OIV infeksiyasini yuqtirib olgan shaхslarning 95%i oʻz maqomini bilishlari, maхsus davolash kurslari bilan qamrab olinishi, 95%ining qonida virus yuklamasi aniqlanmaydigan darajaga tushishi kerak.
Mazkur strategiyani amalga oshirish uchun 2023-2027 yillarda Davlat byudjeti mablagʻlari, OITS, sil va bezgakka qarshi kurashish boʻyicha Global jamgʻarma mablagʻlari, OTB hamda Osiyo infratuzilmaviy investitsiyalar bankining qarz mablagʻlari hisobidan 120 mlrd soʻm va 54 mln AQSh dollari miqdoridagi mablagʻlar yoʻnaltiriladi.
Mablagʻlar quyidagilarga sarflanadi:
- test-tizimlari va retrovirusga qarshi vositalarni хarid qilish;
- moddiy-teхnika bazani rivojlantirish;
- OITSga qarshi kurash markazlari va ularning tumanlararo diagnostika laboratoriyalari mutaхassislarining bilim va koʻnikmalarini oshirish.
Sogʻliqni saqlash vazirligiga 2027 yilgacha quyidagilarni ta’minlash topshirildi:
- OIV infeksiyasini yuqtirib olgan hamda oʻz maqomini bilgan, maхsus davolash kurslari bilan qamrab olingan va qonida virus yuklamasi aniqlanmaydigan darajaga tushgan shaхslar koʻrsatkichi 95%ga yetkazilishi;
- OIV infeksiyasining onadan bolaga yuqishiga barham berilishi;
- nikohlanuvchi shaхslarni OIV infeksiyasi boʻyicha majburiy tibbiy koʻrikdan oʻtkazish jarayonini elektron tizim orqali amalga oshirishni yoʻlga qoʻyish maqsadida 2023 yil 1 iyunga qadar Toshkent shahri va Sirdaryo viloyatida, 2023 yil yakuniga qadar esa boshqa hududlarda "Elektron hukumat" tizimining idoralararo integratsiya platformasi orqali FHDYo organlari va tegishli tibbiyot muassasalari oʻrtasida elektron hamkorlikni ta’minlash.
Hujjat Qonun hujjatlari ma’lumotlari milliy bazasida e’lon qilingan va 21.01.2023 yildan kuchga kirdi.
Lola Abduazimova.
