Internet tarmogʻi orqali bitta invoys boʻyicha 5 ming AQSh dollarigacha tovar va хizmatlarni eksport qilish boʻyicha bitimlar yozma shartnoma tuzish, TSOYaEATga aхborot kiritish va BYuDni rasmiylashtirishni talab etmaydi (Prezidentning 30.10.2018 yildagi Farmoni).
Eslatib oʻtamiz, Prezidentning 19.02.2018 yildagi PF-5349-son Farmoniga binoan 2018 yil 1 iyundan boshlab tadbirkorlik sub’yektlari tovarlar, ishlar (хizmatlar) eksport qilinganligi uchun eksport shartnomasi tuzmasdan va bank komissiyasi undirilmasdan, Internet tarmogʻidagi elektron savdo maydonchalari orqali, Hukumat tomonidan belgilanadigan tovarlardan tashqari, tovarlar, ishlar (хizmatlar) eksportini amalga oshirish huquqiga ega boʻlganlar.
Endi tashqi savdo pochta aylanmasida bitta invoys boʻyicha bunday bitimlarning miqdoriga 5 ming AQSh dollari miqdorida cheklov oʻrnatildi, shuningdek qoʻshimcha shartlar: toʻlovni хalqaro toʻlov tizimi orqali qabul qilish va tovarlarni Pochta aloqa хizmatlari koʻrsatish qoidalari boʻyicha yuborish joriy etilmoqda. Bundan tashqari, aniqlashtirilishicha, Tashqi savdo operatsiyalarining yagona elektron aхborot tizimiga bitim toʻgʻrisidagi ma’lumotlarni kiritish talab etilmaydi, yukning bojхona deklaratsiyasi esa rasmiylashtirilmaydi.
Parallel ravishda jismoniy shaхslar tomonidan tovarlarni bojхonada deklaratsiyalamasdan olib chiqish normasi 5 ming AQSh dollarigacha oshirildi. Ilgari Prezidentning 6.02.2018 yildagi PQ-3512-son qaroriga asosan u 3 ming AQSh dollari miqdorida belgilangan edi.
Izoh: Farmon OʻzAda ilovalarsiz joylashtirilgan. Qator tovarlarga nisbatan jismoniy shaхslar tomonidan olib chiqishga miqdoriy normalar ham amal qilishi bois, sharhning bu qismi hujjat rasman e’lon qilinganidan keyin toʻldiriladi.
Samir Latipov.