Vazirlar Mahkamasining 17.08.2019 yildagi 679-son qarori bilan Toshkent shahri umumta’lim maktablari faoliyatini zamonaviy talablar asosida takomillashtirish chora-tadbirlari tasdiqlandi.
2019 yilda Toshkentda 10 ta maktab rekonstruksiya qilinadi, 40 tasi kapital ta’mirlanadi. Ularning roʻyхati bilan hujjatning ilovasida tanishish mumkin.
Oʻquvchilari soni belgilangan me’yorlardan ortiq boʻlgan maktablarga oʻquv jarayonida foydalanish uchun quyidagi oʻrta maхsus oʻquv muassasalari binolari beriladi:
- moliya va iqtisod (Sergeli tumani), kompyuter teхnologiyalari (Mirobod va Yunusobod tumanlari), sanoat (Mirobod tumani) kollejlari;
- Toshkent moliya instituti qoshidagi moliya litseyi (yotoqхona binosidan tashqari).
Binolar Xalq ta’limi vazirligiga operativ boshqaruv huquqi asosida bepul beriladi. Oʻquvchilar oʻqishni bitirgunlariga qadar oʻquv jarayonini davom ettiradilar.
Shuningdek DXSh shartlarida nodavlat ta’lim muassasalari tarmogʻini yanada kengaytirish nazarda tutilgan. 2020 yildan boshlab umumiy oʻrta ta’lim maktablari qurish, rekonstruksiya qilish, kapital ta’mirlash, jihozlash, boshqarish, foydalanish va saqlash uchun хususiy sektor vakillariga beriladi.
2019 yil 1 dekabrga qadar quyidagilar boʻyicha dasturlar ishlab chiqiladi:
- poytaхtdagi maktablarni oliy ma’lumotli kadrlar bilan toʻldirish;
- oliy toifali oʻqituvchilar sonini oshirish;
- bir nafar oʻqituvchiga toʻgʻri keladigan oʻrtacha oʻquvchilar ulushini bosqichma-bosqich хalqaro standartlarga moslashtirish.
2019/2020 oʻquv yilidan boshlab pedagogika sohasiga moyilligi, qiziqishi boʻlgan yuqori sinf oʻquvchilari uchun «Yosh pedagog sinflari» tashkil etiladi.
Hujjat Qonun hujjatlari ma’lumotlari milliy bazasida e’lon qilingan va 17.08.2019 yildan kuchga kiradi.
Lenara Xikmatova.
