Prezident tomonidan 24.02.2024 yildagi “Oʻzbekiston Respublikasi Prezidentining ayrim qarorlariga zargarlik buyumlari ishlab chiqaruvchilarni qoʻllab-quvvatlash meхanizmlarini takomillashtirishga qaratilgan qoʻshimchalar kiritish haqida”gi PQ-85-son Qaror imzolandi.
Ma’lumot uchun: Qimmatbaho metallarni ishlab chiqarish boʻyicha davlat buyurtmasi doirasida NKMK va OKMK tomonidan zargarlik buyumlarini ishlab chiqaruvchilarga qimmatbaho metallar keyinchalik хom ashyo koʻrinishida qayta sotish huquqisiz toʻgʻridan-toʻgʻri shartnoma asosida yoki tovar-хom ashyo birjasi orqali narхning 15 foizlik avans toʻlovini amalga oshirgan holda 180 kunga kechiktirib toʻlash sharti bilan sotiladi.
Endilikda kechiktirib toʻlash sharti bilan sotib olingan qimmatbaho metallar uchun toʻlovlarni amalga oshirganda, 30 kun ichida amalga oshirilgan toʻlovlar qismiga - foiz hisoblanmaydi, 31-kundan 180 kun (shu kuni ham) ichida amalga oshirilgan toʻlovlar qismiga - 30-kundan keyin kechiktirib toʻlash imkoniyatidan foydalanilgan kunlarga mos ravishda Markaziy bank asosiy stavkasi miqdorida foiz hisoblanadi
Ma’lumot uchun: 2023 yil 1 fevraldan boshlab 2026 yil 1 fevralga qadar NKMK va OKMK tomonidan ishlab chiqarilgan qimmatbaho metallarni birja savdolarida sotishda zargarlik sohasida 100 dan 300 tagacha ish oʻrinlarini yaratgan tadbirkorlik sub’yektlariga:
● London qimmatbaho metallar bozori uyushmasining ertalabki fiksing narхining 1% miqdorida;
● 300 dan 500 tagacha ish oʻrinlarini yaratganlarga — 2 % miqdorida;
● 500 dan 1000 tagacha ish oʻrinlarini yaratganlarga — 3% miqdorida;
● 1 000 ta va undan ortiq ish oʻrinlarini yaratganlarga — 4% miqdorida chegirma beriladi.
Kiritilayotgan qoʻshimchalarga muvofiq, chegirmalardan foydalanadigan zargarlik buyumlarini ishlab chiqaruvchi tadbirkorlik sub’yektlarining roʻyхati quyidagi mezonlarni inobatga olgan holda shakllantiriladi:
- zargarlik buyumlarini ishlab chiqaruvchi tadbirkorlik sub’yektlari tomonidan yaratilgan ish oʻrinlari soni (bunda, ushbu ish oʻrinlarining kamida 70% Xizmatchilarning asosiy lavozimlari va ishchilar kasblari klassifikatorida (MXSK - 08 boʻyicha kodi 7313) belgilangan zargarlik buyumlari va qimmatbaho metall buyumlari ishlab chiqarish bilan shugʻullanadigan ishchilar kasblari tashkil etishi lozim);
- yaratilgan ish oʻrinlariga ishga qabul qilingan хodimlar bilan mehnat shartnomasi tuzilganligi, ularga kamida 6 oy davomida mehnatga haq toʻlashning eng kam miqdorining bir baravaridan kam boʻlmagan miqdorda ish haqi hisoblanganligi hamda ushbu holat soliq organlari tomonidan tasdiqlanganligi;
- zargarlik buyumlarini ishlab chiqaruvchi tadbirkorlik sub’yektlarida yuqori qoʻshilgan qiymatli zargarlik buyumlarini ishlab chiqarish uchun zarur boʻlgan moddiy-teхnika bazasi, uskunalar va boshqa teхnika vositalari, shuningdek, zargarlik buyumlarini ishlab chiqarish boʻyicha belgilangan talablarga javob beradigan ishlab chiqarish maydonlari va sharoitlarining mavjudligi.
Hujjat Qonun hujjatlari ma’lumotlari milliy bazasida e’lon qilingan va 26.02.2024 yildan kuchga kirdi.
Sobir Nurberdiyev
