Prezidentning 2.11.2021 yildagi «Qishloq хoʻjaligini davlat tomonidan qoʻllab-quvvatlash хarajatlarini moliyalashtirishning uzluksizligini ta’minlash toʻgʻrisida»gi PQ-5272-son qarori qabul qilindi.
Hujjatga muvofiq Moliya vazirligiga Qishloq хoʻjaligini davlat tomonidan qoʻllab-quvvatlash jamgʻarmasi uchun 100 mln AQSh dollari ekvivalentidagi mablagʻlar ajratiladi. Ushbu mablagʻlar qishloq хoʻjaligini davlat tomonidan qoʻllab-quvvatlash bilan bogʻliq хarajatlarni moliyalashtirish uchun milliy valyutada 5 yil muddatga foizsiz beriladi.
Shuningdek hujjat bilan Prezidentning 27.03.2021 yildagi PQ-5041-son hamda 26.05.2021 yildagi PQ-5125-son qarorlariga oʻzgartirishlar kiritildi.
Prezidentning 27.03.2021 yildagi PQ-5041-son qarorining 5-bandida Moliya vazirligiga mazkur qarorning 4-bandiga asosida Tiklanish va taraqqiyot jamgʻarmasi tomonidan ajratiladigan 1,5 trln soʻm kredit resurslarining tijorat banklari tomonidan qaytarilmagan qismida respublika byudjeti hisobidan 2026 yilda qoplanishini ta’minlash topshirildi. Bunda Tiklanish va taraqqiyot jamgʻarmasiga qoplanmagan mablagʻlar miqdoridagi vakolatli banklarning majburiyatlari Moliya vazirligi foydasiga qayta rasmiylashtiriladi.
Prezidentning 26.05.2021 yildagi PQ-5125-son qarorining 2-bandida ushbu qarorning 1-bandiga muvofiq Moliya vazirligiga foizsiz ajratiladigan pul mablagʻlarini qaytarish muddati 2026 yilga qadar uzaytirildi. Shuningdek belgilanishicha, ajratilayotgan mablagʻlarni qaytarish respublika byudjeti mablagʻlari hamda qonunchilik hujjatlarida taqiqlanmagan boshqa manbalar hisobidan amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 2.11.2021 yildan kuchga kirdi.
Elmira Siraziyeva.
