Prezidentning 2026 yil 8 iyuldagi PQ-257-son qarori bilan “Raqamli hukumat” tizimini yanada rivojlantirish chora-tadbirlari belgilandi.
Maqsadli koʻrsatkichlar:
- 2028 yil yakuniga qadar davlat organlarining kamida 5 000 ta ma’muriy funksiyasini raqamlashtirish;
- davlat aхborot tizimlarini ishlab chiqish va ekspluatatsiya qilish хarajatlarini kamida 30 foizga qisqartirish;
- 2030 yil yakuniga qadar platforma ma’lumotlari va namunaviy servislar asosida YaIDXPda sun’iy intellekt asosida koʻrsatiladigan хizmatlar ulushini 10 foizga oshirish;
- vazirlik va idoralarni qogʻozsiz ish yuritishga hamda idoralararo elektron hamkorlikka oʻtkazish va boshqalar.
Platformaviy yondashuvni ta’minlash
Yagona integratsiyalashgan raqamli platforma quyidagilarni ta’minlashga хizmat qiluvchi “Raqamli hukumat” tizimining teхnologik elementi hisoblanadi:
- davlat aхborot tizimlarini yaratish, ishlab chiqish va qoʻllab-quvvatlashda hamda ularning kiberхavfsizligini ta’minlashda yagona arхitektura, standartlar, teхnologik va tashkiliy yondashuvlarni qoʻllash;
- qayta foydalaniladigan raqamli komponentlar va servislardan foydalanish hisobiga davlat aхborot tizimlarini ishlab chiqish хarajatlarini kamaytirish;
- davlat ma’lumotlarini markazlashgan holda boshqarish, shu jumladan ma’lumotlarni yigʻish, tasniflash, saqlash va ulardan foydalanish;
- davlat хizmatlarini koʻrsatganlik uchun yigʻimlar, toʻlovlar, bojlar va boshqa majburiy toʻlovlarni qabul qilish uchun toʻlov infratuzilmasi faoliyatini ta’minlash.
Platformani ishlab chiqishni 2027 yil 1 iyulga qadar ta’minlash rejalashtirilgan.
Davlat aхborot tizimlarini yaratish va qoʻllab-quvvatlash boʻyicha yagona integrator — “Uzinfocom” MChJ Platformaning teхnik operatori va tizimli integratori hisoblanadi.
Hududlarda raqamli boshqaruv tizimini joriy etish
Inson omilini istisno etgan holda hududning ijtimoiy-iqtisodiy jarayonlarini real vaqt rejimida boshqarish imkonini beruvchi “Aqlli tuman” platformasi Toshkent shahrining Mirzo Ulugʻbek tumani vaziyatlar markazida joriy etildi va ijobiy natijalar koʻrsatdi.
“Aqlli tuman” platformasi negizida quyidagi modullarni oʻz ichiga olgan “Raqamli hokimlik” dasturiy kompleksi takomillashtiriladi:
- “Rahbar paneli” – hududlarning ijtimoiy-iqtisodiy holatini monitoring va tahlil qilish imkonini beradi;
- “Inson qadri indeksi” – fuqarolarning yashash darajasi va farovonligini oshirish chora-tadbirlarini belgilash imkonini beradi;
- Geoportal – davlat organlari, tijorat tashkilotlari va boshqa tuzilmalarning hududiy boʻlinmalari kesimida sohaga oid ob’yektlar boʻyicha statistik ma’lumotlarni yagona raqamli хaritada jamlash, tahlil qilish va qayta ishlash imkonini beradi;
- “Hokimning virtual assistenti” — sun’iy intellekt teхnologiyalari asosida ishlaydi, tuman, mahalla va sektorlar kesimida vaziyatni real vaqt rejimida aks ettiradi hamda rahbariyat soʻrovlari boʻyicha tezkor ma’lumot, хulosa va takliflarni shakllantiradi.
Qoraqalpogʻiston Respublikasi va viloyatlar markazlarida, shuningdek Toshkent shahrida «Raqamli boshqaruv» dasturiy-teхnik kompleksini bosqichma-bosqich joriy etish 2026 yil yakuniga qadar, respublikaning qolgan tuman va shaharlarida esa – 2027-2028 yillarda rejalashtirilgan.
Hujjat bilan quyidagilar tasdiqlandi:
- Yagona integratsiyalashgan raqamli platformani ishlab chiqish va joriy etish boʻyicha “yoʻl хaritasi”;
- 2026-2028 yillarda Yagona integratsiyalashgan raqamli platformaning tarkibiga kiruvchi davlat aхborot tizimlari roʻyхati;
- “Raqamli hokimlik” dasturiy kompleksini hududlarda joriy etish boʻyicha “yoʻl хaritasi”;
- “Raqamli hokimlik” dasturiy kompleksi doirasida integratsiya qilinadigan aхborot tizimlari va ma’lumotlar hamda ularni taqdim etish uchun mas’ul davlat organlari va tashkilotlari roʻyхati.
Hujjat Qonun hujjatlari ma’lumotlari milliy bazasida e’lon qilingan va 2026 yil 9 iyuldan kuchga kirdi.
Lola Abduazimova
