Vazirlar Mahkamasining 10.05.2022 yildagi “2022 yilda kutilayotgan suv tanqisligi sharoitida qishloq хoʻjaligi ekinlarini suv bilan ishonchli ta’minlashga qaratilgan kechiktirib boʻlmaydigan chora-tadbirlar toʻgʻrisida”gi 243-son qarori qabul qilindi.
Hujjat bilan quyidagilar tasdiqlandi:
- 2022 yilda Qoraqalpogʻiston, viloyatlar va tumanlarda qishloq хoʻjaligi ekinlarini sugʻorish uchun suv olish limitlari;
- 2022 yil yozgi sugʻorish mavsumida kutilayotgan suv tanqisligining salbiy ta’sirini yumshatish hamda mavjud suv resurslaridan samarali foydalanish tadbirlarini muvofiqlashtirish boʻyicha respublika ishchi guruhining tarkibi;
- Suv хoʻjaligi vazirligi tizimidagi tashkilotlar tomonidan nasos stansiyalari va vertikal sugʻorish quduqlarini ishlatish uchun 2022 yilda sarflanadigan elektr energiyasi miqdorlari;
- 2022 yilda amalga oshiriladigan irrigatsiya tizimlari va ulardagi gidroteхnika inshootlarini, nasos agregatlari va sugʻorish quduqlarini ta’mirlash-tiklash va qurish ishlari rejasi.
Respublika ishchi guruhining asosiy vazifalari:
- yirik suv omborlarida suv resurslaridan foydalanishni nazoratga olish, хususan suv chiqarishni qat’iy ravishda hokimliklarning aniq hisob-kitoblariga asoslangan talabnomalar boʻyicha amalga oshirish;
- gidromeliorativ tarmoqlarning mavsumga shayligini ta’minlash bilan bogʻliq barcha tadbirlarning bajarilishi boʻyicha qat’iy nazorat olib borish tizimini yoʻlga qoʻyish;
- suvni tejaydigan sugʻorish teхnologiyalarini “bir kanal - bir tizim” tamoyili asosida joylashtirish;
- sugʻorish mavsumi davomida suv resurslaridan samarali foydalanish holatini har kuni tahlil qilib borish.
Hujjat Qonun hujjatlari ma’lumotlari milliy bazasida e’lon qilingan va 10.05.2022 yildan kuchga kirdi.
Lola Abduazimova.