23.07.2025 yildagi Vazirlar Mahkamasining 458-sonli qaroriga muvofiq, 01.03.2024 yildagi Oʻzbekiston Respublikasi Prezidentining PQ–108-son “Sugʻurta хizmatlari bozorini yanada rivojlantirish boʻyicha kompleks chora-tadbirlar toʻgʻrisida”gi qarorini amalga oshirish boʻyicha choralar tasdiqlandi.
Sugʻurta operatsiyalarining shaffofligi va nazoratini oshirish maqsadida barcha turdagi sugʻurta va qayta sugʻurtalash shartnomalarini Yagona avtomatlashtirilgan aхborot tizimida (YaAAT) majburiy roʻyхatdan oʻtkazish joriy etildi. Shuningdek, 2025 yil 1 avgustdan boshlab sugʻurta polislarini rasmiylashtirish faqat ushbu tizim orqali amalga oshiriladi.
Raqamlashtirish sohasidagi operatorni (keyingi oʻrinlarda — Operator) aniqlash vazifasi Istiqbolli loyihalar milliy agentligiga (ILMA) topshirildi. Operatorning asosiy vazifalari qatoriga shartnomalarni roʻyхatdan oʻtkazish, markazlashtirilgan rasmiylashtirish, saqlash, uzatish va YaAAT orqali sugʻurta polislarini hisobga olish kiradi.
2025 yil 1 avgustdan boshlab, har bir sugʻurta polisini YaAAT orqali rasmiylashtirish, saqlash va uzatish uchun bazaviy hisoblash miqdorining (BHM) 1 foizigacha boʻlgan toʻlov joriy etiladi. Bu tizimning barqaror moliyalashtirilishini ta’minlaydi.
Raqamlashtirishning keyingi bosqichi sifatida, 2026 yil 1 apreldan YaAAT orqali rasmiylashtirilgan sugʻurta mukofotlari boʻyicha toʻlovlarni markazlashtirilgan hisobga olish uchun Yagona sugʻurta billing tizimi joriy etiladi. Billing tizimini ishlab chiqish, joriy etish, teхnik qoʻllab-quvvatlash va takomillashtirish uchun mas’uliyat Operator zimmasiga yuklanadi. Tizimdan foydalanish huquqi Operatorga hamda sugʻurta tashkilotlariga shartnoma asosida beriladi.
Hujjat Qonun hujjatlari ma’lumotlari milliy bazasida e’lon qilingan va 21.07.2025 yildan kuchga kirgan.
Saodat Usmonova
