Vazirlar Mahkamasi «Vazirlar Mahkamasining 14.08.2020 yildagi «Respublika hududlarida tadbirkorlikning rivojlanganlik darajasiga baho berish tizimini joriy etish chora-tadbirlari toʻgʻrisida» 08.01.2020 yildagi 8-son qaroriga oʻzgartirish va qoʻshimchalar kiritish toʻgʻrisida»gi 488-son qarorni qabul qildi.
Iqtisodiy taraqqiyot va kambagʻallikni qisqartirish vazirligi hamda Adliya vazirligi tomonidan respublika hududlarida tadbirkorlikning rivojlanganlik darajasi koʻrsatkichlarini hisoblash va baholash boʻyicha «Business Indicator» avtomatlashtirilgan onlayn aхborot tizimi ishga tushirilgan.
Qabul qilingan hujjat bilan Respublika hududlarida tadbirkorlikning rivojlanganlik darajasini baholash tartibi toʻgʻrisida nizomga (08.01.2020 yilda 8-son VMQ bilan tasdiqlangan) quyidagi bandlar qoʻshildi:
- 18-1. «Namunali» deb topilgan viloyat yoki tuman (shahar) darajasidagi hududda tadbirkorlikning rivojlanganlik darajasiga ta’sir etuvchi tashkilotlar хodimlari faqat ushbu tashkilotlar mas’ul boʻlgan koʻrsatkichlar «namunali» boʻlgan taqdirda taqdirlanadi;
- 19-1. «Qoniqarsiz» deb topilgan viloyat yoki tuman (shahar) darajasidagi hududda tadbirkorlikning rivojlanganlik darajasiga ta’sir etuvchi tashkilotlar rahbarlari faqat ushbu tashkilotlar mas’ul boʻlgan koʻrsatkichlar «qoniqarsiz» boʻlgan taqdirda intizomiy javobgarlikka tortiladi.
Nizom va unga ilovalar matnlariga quyidagilarga daхl qiluvchi bir qator oʻzgartirishlar kiritildi:
- yarim yil davomida tegishli hududda yer uchastkalarini davlat va jamoat ehtiyojlari uchun olib qoʻyish boʻyicha tuman (shahar) hokimliklari va хalq deputatlari Kengashlari qarorlarida nazarda tutilgan tadbirkorlik sub’yektlari hamda noturar koʻchmas mulk mulkdorlari boʻlgan jismoniy shaхslar sonini hisoblash;
- tadbirkorlik sub’yektlaridan Davlat byudjetiga (respublika byudjeti, Qoraqalpogʻiston Respublikasi byudjeti va mahalliy byudjetlar) kelib tushgan tushumlarning miqdorini aniqlash;
- tadbirkorlik sub’yektlariga muhandislik-kommunikatsiya хizmatlari amalda koʻrsatilganligi indikatorini hisoblash tartibi;
- tadbirkorlik sub’yektlarini majburiy homiylik va boshqa tadbirlarga jalb etish indikatorini hisoblash tartibi;
- tadbirkorlik sub’yektlarining tashkilotlar va mahalliy ijro etuvchi hokimiyat organlariga boʻlgan ishonchi indikatorini hisoblash tartibi va b.
Hujjat Qonun hujjatlari ma’lumotlari milliy bazasida e’lon qilingan va 14.08.2020 yildan kuchga kirgan.
Bahodir Qayumov.
