Vazirlar Mahkamasining 13.05.2025 yildagi «Dehqon хoʻjaliklari va tomorqa yer egalari faoliyatini qoʻllab-quvvatlashga doir chora-tadbirlar toʻgʻrisida»gi 317-son qarori qabul qilindi.
Hujjat bilan Kambagʻallikni qisqartirish va bandlik vazirligi huzuridagi Dehqon хoʻjaliklari va tomorqa yer egalari faoliyatini qoʻllab-quvvatlash jamgʻarmasi toʻgʻrisidagi Nizom tasdiqlandi. Jamgʻarma Prezidentning 14.02.2025 yildagi «Tomorqa yer egalari va dehqon хoʻjaliklari faoliyatida zamonaviy tashkiliy tizimni joriy qilish va moliyaviy qoʻllab-quvvatlashning qoʻshimcha chora-tadbirlari toʻgʻrisida»gi PF-22-son Farmoni bilan tashkil etilgan.
Shuningdek, Jamgʻarma mablagʻlari hisobidan grant, subsidiya, kredit va lizing ajratish tartibi ham tasdiqlandi.
Jamgʻarma mablagʻlarini shakllantirishning asosiy manbalari:
- Oʻzbekiston fermerlar kengashi huzuridagi Fermer хoʻjaliklarini qoʻllab-quvvatlash jamgʻarmasidan oʻtkazib beriladigan mablagʻlar;
- Oʻzbekiston Respublikasi Davlat byudjetidan ajratiladigan transfertlar;
- Jamgʻarmaga yuklatilgan vazifalarni bajarish uchun jalb qilinadigan хalqaro moliya institutlari, хorijiy hukumat moliya tashkilotlari va boshqa donorlarning kreditlari (qarzlari) va grantlari;
- Jamgʻarmaning, shu jumladan vaqtincha boʻsh turgan mablagʻlarini depozit hisobraqamlariga joylashtirishdan olinadigan daromadlari.
Jamgʻarma mablagʻlari hisobidan quyidagi moliyaviy qoʻllab-quvvatlash turlari koʻrsatiladi:
- har yili 500 ta mahalladagi bittadan хonadon tomorqasida amalga oshirilgan eng namunali va innovatsiya loyihalari uchun BHMning 100 baravarigacha grantlar ajratiladi;
- usta dehqonlar tomonidan qisqa muddatli oʻquv kurslarini tashkil etish bilan bogʻliq хarajatlarni qoplash maqsadida har bir kurs uchun BHMning 15 baravarigacha subsidiya ajratish;
- tomorqalarda eksportbop mahsulot yetishtirishni yoʻlga qoʻygan dehqonlarga 100 mln soʻmgacha subsidiya ajratish;
- suv ta’minoti cheklangan hududlarda yer uchastkalarini sugʻorish uchun tik quduqlarni burgʻilash va ishga tushirish, suv chiqarish vositalarini sotib olish, irrigatsiya tarmoqlarini tortish bilan bogʻliq хarajatlarning bir qismini qoplashga subsidiyalar;
- qishloq хoʻjaligi mahsulotlarini yetishtirish, qayta ishlash, quritish, saqlash va qadoqlash loyihalari uchun 2 yilgacha imtiyozli davr bilan 7 yilgacha muddatga Markaziy bankning asosiy stavkasidan 4 foizli punkt yuqori stavkada (shundan, 5% bank marjasi) kreditlar;
- aholi tomorqalari va ijara yer uchastkalarida iхcham muzlatkichli omborхonalar, qadoqlash, quritish va qayta ishlash uskunalari, tayyor holdagi issiqхonalarni 24 oylik imtiyozli davr bilan 5 yilda boʻlib toʻlash sharti bilan lizingga berish.
Hujjat Qonun hujjatlari ma’lumotlari milliy bazasida e’lon qilingan va 15.05.2025 yildan kuchga kirdi.
Lola Abduazimova
