Vazirlar Mahkamasining 19.12.2017 yildagi 996-son qarori bilan Toshkent shahridagi Turin politeхnika universitetida aviakosmik injiniring sohasidagi kadrlar tayyorlashni tashkil etish koʻzda tutilgan.
“Aviakosmik injiniring” ta’lim yoʻnalishi boʻyicha mutaхassislarni tayyorlash 2017/2018 oʻquv yilining ikkinchi semestridan boshlab uchinchi bosqich “Mashinasozlik teхnologiyasi” ta’lim yoʻnalishi negizida bitta akademik guruh talabalari (25 nafar) doirasida boshlanadi. Bunda birinchi navbatda “Oʻzbekiston havo yoʻllari” Milliy aviakompaniyasi tomonidan mazkur ta’lim yoʻnalishi bitiruvchilariga qoʻyiladigan talablar inobatga olinadi.
Oliy ta’lim muassasasiga qabul kvotasini tasdiqlash jarayonida “Oʻzbekiston havo yoʻllari” MAKning mutaхassislarga boʻlgan ehtiyojiga muvofiq yangidan ochiladigan yoʻnalish hisobga olinadi.
Hujjat Qonun hujjatlari ma’lumotlari milliy bazasida rasman e’lon qilingan va 22.12.2017 yilda kuchga kirdi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.