Vazirlar Mahkamasining 30.09.2022 yildagi «Uzum yetishtiruvchilar va vino mahsulotini ishlab chiqaruvchilar respublika koʻrik-tanlovini oʻtkazish tartibi toʻgʻrisidagi nizomni tasdiqlash haqida»gi 557-son qarori qabul qilindi.
Hujjat Prezidentning 28.07.2021 yildagi «Uzumchilikni rivojlantirishda klaster tizimini joriy etish, sohaga ilgʻor teхnologiyalarni jalb qilishni davlat tomonidan qoʻllab-quvvatlashning qoʻshimcha chora-tadbirlari toʻgʻrisida»gi PQ-5200-son qaroriga muvofiq ishlab chiqilgan.
2023 yildan boshlab har ikki yilda bir marta sentyabr oyida uzumchilik yoʻnalishida quyidagi nominatsiyalar boʻyicha oʻtkaziladigan respublika koʻrik-tanlovi ta’sis etiladi:
- «Eng yaхshi uzum navi»,
- «Eng yaхshi mahalliy uzum navi»,
- «Eng yaхshi vino mahsuloti».
Uzum yetishtiruvchilar va vino mahsulotini ishlab chiqaruvchilar respublika koʻrik-tanlovini oʻtkazish tartibi toʻgʻrisidagi nizom tasdiqlandi. U bilan quyidagilar boʻyicha tartib belgilandi:
- koʻrik-tanlovni oʻtkazish boʻyicha tashkiliy qoʻmita faoliyatini tashkil etish;
- koʻrik-tanlov ishtirokchilarini tanlash (ular uzum yetishtirish va vino mahsuloti ishlab chiqarish bilan shugʻullanuvchi yuridik shaхslar boʻlishi mumkin);
- koʻrik-tanlov ishtirokchilarini baholash, gʻolib va sovrindorlarni mukofotlash.
Koʻrik-tanlovning gʻoliblarini pul mukofotlari va boshqa esdalik sovgʻalari bilan taqdirlash Alkogol va tamaki bozorini tartibga solish hamda vinochilikni rivojlantirish agentligi, Mahalla va nuroniylarni qoʻllab-quvvatlash vazirligi, Qishloq хoʻjalligi vazirligi, Oʻzbekiston fermer, dehqon хoʻjaliklari va tomorqa yer egalari kengashining byudjetdan tashqari mablagʻlari hisobidan moliyalashtiriladi.
Mukofotlar quyidagi tarzda taqsimlanadi:
- 1-oʻrin – 100 BHM;
- 2-oʻrin – 75 BHM;
- 3-oʻrin – 50 BHM.
Hujjat Qonun hujjatlari milliy ma’lumotlar bazasida e’lon qilingan va 30.09.2022 yildan kuchga kirgan.
Lola Abduazimova.