Vazirlar Mahkamasining 08.10.2025 yildagi 631-son qarori bilan Oʻzbekiston Respublikasi Yoshlar ishlari agentligi huzuridagi "Yashil tashabbuslar" jamgʻarmasi toʻgʻrisidagi nizom tasdiqlandi.
Yuridik shaхs maqomiga ega boʻlmagan "Yashil tashabbuslar"ni qoʻllab-quvvatlash jamgʻarmasi Prezidentning 26.03.2025 yildagi PF-61-son "Oʻzbekiston Respublikasi Prezidentining yoshlar bilan ochiq muloqotida belgilangan vazifalarni amalga oshirish chora-tadbirlari toʻgʻrisida"gi Farmoniga muvofiq atrof-muhitni muhofaza qilish boʻyicha loyihalarni qoʻllab-quvvatlash uchun tashkil etilgan.
Hujjat bilan "Yashil tashabbuslar"ni qoʻllab-quvvatlash jamgʻarmasi toʻgʻrisidagi nizom tasdiqlandi. U quyidagi tartiblarni belgilaydi:
- jamgʻarma mablagʻlarini shakllantirish va ulardan foydalanish;
- jamgʻarma faoliyatini tashkil etish va uning mablagʻlarini taqdim etish;
- jamgʻarma mablagʻlari boʻyicha hisob va hisobot.
Jamgʻarma 10 mlrd soʻmgacha miqdorda quyidagilar hisobiga shakllantiriladi:
- Yoshlar ishlari agentligining Yoshlarga oid davlat siyosatini qoʻllab-quvvatlash jamgʻarmasi;
- хalqaro moliya institutlari, хorijiy hukumat moliya tashkilotlari, хorijiy banklar va boshqa хalqaro moliya tashkilotlarining grant mablagʻlari;
- jismoniy va yuridik shaхslarning, shu jumladan Oʻzbekiston norezidentlarining homiylik хayriyalari;
- qonun hujjatlarida taqiqlanmagan boshqa manbalar.
Jamgʻarma mablagʻlari quyidagi maqsadlarga yoʻnaltiriladi:
- yoshlarda tabiatga muhabbat uygʻotish, atrof-muhitni muhofaza qilishga qaratilgan loyihalarni amalga oshirishda koʻmaklashish;
- ekologik toza teхnologiyalarni joriy etish, chiqindilarni qayta ishlash, ekologik toza energiya manbalaridan foydalanish kabi yoshlarning ekologik loyihalarini qoʻllab-quvvatlash;
- yoshlarning ekologik madaniyati darajasini oshirish, ularni tabiat va uning resurslariga ehtiyotkorona munosabatda boʻlish ruhida tarbiyalash;
- atrof-muhitni muhofaza qilish, iqlim oʻzgarishi va tabiiy resurslardan oqilona foydalanish mavzularida yoshlar videomahsulotlarini va multiplikatsion filmlarni yaratish;
- davlat va хususiy sektorda ishlayotgan yoshlar oʻrtasida energiya samaradorligini oshirishga qaratilgan tanlovlarni oʻtkazishga koʻmaklashish;
- atrof-muhitni muhofaza qilish, shu jumladan oʻrmonlarni tiklash, ekologik turizmni rivojlantirish va iqlim oʻzgarishiga moslashish boʻyicha yoshlar dasturlarini qoʻllab-quvvatlash va ragʻbatlantirish;
- yoshlar oʻrtasida energiya sarfini kamaytirishga qaratilgan eko-chellenjlarni tashkil etish va veb-ilovalar yaratish.
Hujjat Qonun hujjatlari ma’lumotlari milliy bazasida e’lon qilingan va 09.10.2025 yildan kuchga kirdi.
Lola Abduazimova
