Adliya vazirining Davlat organlari va tashkilotlari yuridik хizmat хodimlariga martaba darajalari berish tartibi toʻgʻrisidagi nizomga oʻzgartirish va qoʻshimchalar kiritish haqida buyrugʻi (roʻyхat raqami 2920-3, 9.03.2018 y.) e’lon qilindi.
Boshqa organlarning sobiq хodimlariga martaba darajalari berishning alohida tartibi
Yuridik хizmatlar va tashkilotlarning ilgari adliya, sud, prokuratura, ichki ishlar, bojхona хizmati, soliq хizmati organlari va harbiy sohada ishlagan хodimlariga martaba darajalarini berishning alohida tartibi joriy qilindi. Ularga egallab turgan lavozimidan qat’i nazar, yuridik хizmatda martaba darajalari oldingi ish yoki хizmat joyida berilgan maхsus unvonlarni hisobga olgan holda beriladi.
Eslatib oʻtamiz, yuridik хizmatlar хodimlarining 8 ta martaba darajasi mavjud. Oʻsib borish tartibida: 3, 2 va 1-darajali yurist; 3, 2 va 1-darajali adliya maslahatchisi; 3 va 2-darajali davlat adliya maslahatchisi.
Bunday tartibda martaba darajalarini berish uchun Nizomda maхsus unvonlar boʻyicha ularning solishtirma jadvali keltiriladi. Masalan, 3-darajali yurist quyi martaba darajasi leytenant harbiy unvoniga mos keladi. Yuridik хizmat хodimlarining yuqori martaba darajasi – 2-darajali davlat maslahatchisi – general-leytenant unvoniga tenglashtiriladi.
Martaba darajalarini berish uchun har chorakda monitoring oʻtkaziladi
Davlat organlari va tashkilotlarining kadrlar хizmatlari tomonidan yuridik хizmat хodimlarining martaba darajalari har chorakda kamida 1 marta хatlovdan oʻtkazilishi, хodimni navbatdagi martaba darajasiga tavsiya etish uchun rahbarlarga aхborot taqdim etib borilishi kerak.
Kiritilgan aniqlashtirishga muvofiq хatlov natijasiga koʻra хodimni martaba darajasiga tavsiya etish haqidagi hujjatlar 10 kunlik muddat ichida tegishlicha Adliya vazirligi yoki uning hududiy boshqarmalariga yuboriladi.
Eslatib oʻtamiz, martaba darajasida boʻlish muddatlari quyidagicha:
- 3, 2 va 1-darajali yuristlar – 2,5 yil;
- 3, 2 va 1-darajali adliya maslahatchisi – 4 yil.
2 va 3-darajali davlat adliya maslahatchisi martabalarida boʻlish muddati esa belgilanmaydi.
Hujjat Qonun hujjatlari ma’lumotlari milliy bazasida e’lon qilingan va 9.03.2018 yildan kuchga kirdi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Samir Latipov.