Адлия вазирининг буйруғи (рўйхат рақами 2864, 8.09.2018 й.) билан Юридик хизмат ходимини лавозимга тайинлаш ва озод килиш масалаларини адлия органлари билан келишиш тартиби тугрисидаги низомга ўзгартириш ва қўшимчалар киритилди.
Эслатиб ўтамиз, Президентнинг 19.01.2017 йилдаги “Юридик хизмат фаолиятини тубдан такомиллаштириш чора-тадбирлари тўғрисида” ПҚ-2733-сон қарорига биноан давлат органлари ва ташкилотларининг юридик хизматлари ходимларини лавозимга тайинлаш ва лавозимдан озод этиш масалалари мажбурий тартибда адлия органлари билан келишилади.
Қабул қилинган ҳужжат шундай келишув тартибига қуйидаги тузатишларни киритди.
Биринчидан, номзоди адлия органлари билан келишилган ходимни мазкур давлат органи ёки ташкилотининг юридик хизматидаги бошқа лавозимга ўтказиш янгидан келишишни талаб этмайди. Бироқ у, илгаригидек, юридик хизмат раҳбари ва раҳбар ўринбосари лавозимини эгаллаш учун зарур.
Бунда аниқлаштирилишича, Олий Мажлис палаталари, Президент Администрацияси ва Вазирлар Маҳкамасининг юридик хизматларидаги лавозимларга номзодлар ҳамда мазкур органлар билан келишилган юридик хизматлар ходимлари адлия органлари билан келишилмайди.
Иккинчидан, олий юридик маълумотга эга бўлмаган шахслар, шунингдек хорижда таълим олган номзодларни келишиш учун давлат органлари ва ташкилотлари томонидан номзодни лавозимга тайинлаш масаласини келишиш учун тақдим этиладиган ҳужжатлар рўйхатига тузатиш киритилди. Улар бўйича тегишинча иш берувчининг муҳри билан тасдиқланган:
- олий маълумоти тўғрисидаги дипломининг нусхаси ва ТДЮУ ҳузуридаги Юридик кадрларни халқаро стандартлар бўйича профессионал ўқитиш маркази дипломидан нусха;
- хорижда ўқишни тамомлаганлик тўғрисидаги ҳужжат ва унинг эквивалент деб топилганлиги тўғрисида гувоҳноманинг нусхалари тақдим этилиши зарур.
Учинчидан, суҳбатга кела олмайдиган шахсларга бу ҳақда адлия органи ҳузуридаги комиссияни олдиндан хабардор қилиш имконияти тақдим этилди. Бу ҳолда суҳбат кейинги йиғилишга кўчирилади.
Тўртинчидан, адлия органи томонидан кетма-кет тақдим этилган икки номзод суҳбатдан ўта олмаган тақдирда, у ўз номзодини давлат органи ёки ташкилотига ишга юбориши мумкин бўлган норма бекор қилинди. Аксинча, энди суҳбатдан ўта олмаган номзодлар 1 ой муддат (агар номзод суҳбатдан 3 марта ўта олмаган бўлса – 3 ой муддат) ўтгач худди шу лавозимга тавсия этилиши мумкин.
Бешинчидан, аниқлаштирилишича, пенсияга чиқиши муносабати билан меҳнат шарномаси бекор қилинганда (МК 100-моддаси 7-банди), шунингдек лавозим қонун ҳужжатларига мувофиқ тугатилганда юридик хизмат ходими билан меҳнат шартномасини бекор қилишни келишиш талаб этилмайди.
Бироқ юридик хизмат ходимларини у билан боғлиқ бўлмаган бошқа ишга ўтказиш, энди аксинча келишилиши лозим.
Ҳужжат Қонун ҳужжатлари маълумотлари миллий базасида эълон қилинган ва 10.09.2018 йилдан кучга кирди.
Самир Латипов.
