Бандлик ва меҳнат муносабатлари вазирининг буйруғи билан хусусий меҳнат шартномалари бўйича хорижда меҳнат фаолиятини амалга ошириш учун фуқароларнинг ихтиёрий рўйхатдан ўтиши батафсил тартиби (27.09.2018 йилда 3070-сон билан рўйхатдан ўтказилган) тасдиқланди.
Эслатиб ўтамиз, жорий йил 1 августдан фуқароларимизни хорижда ишга жойлаштириш тартиби соддалаштирилди. Хусусан, илгари хорижга ишлаш учун кетаётганлар Ташқи меҳнат миграцияси агентлиги (бундан кейин – Агентлик) рухсатномасини олишлари шарт бўлган бўлса, энди ушбу талаб бекор қилинди. Бунинг ўрнига хусусий меҳнат шартномалари бўйича хорижга кетаётган мигрантларнинг ихтиёрий рўйхатдан ўтиш тартиб-таомили жорий этилди.
Ихтиёрий рўйхатдан ўтиш бир қатор имтиёзларни олиш имконини беради:
- темир йўл чипталарига (плацкарт ва умумий вагонларга) ҳамда авиачипталарнинг (эконом класс) нархларига 20 фоиз чегирма;
- «VISA-migrant» банк пластик картаси орқали йилига 1 маротаба бир марталик чипталар олиш учун бўлган харажатларнинг 2018–2019 йилларда 300 минг сўмгача миқдорда қисман қопланиши.
Юқорида кўрсатилган имтиёзларни расмийлаштиришнинг батафсил тартиби – бу ерда.
Меҳнат мигранти сифатида рўйхатдан ўтиш учун Агентликнинг www.migration.uz расмий сайтига киришнинг ўзи кифоя. Фойдаланувчининг кейинги хатти-ҳаракатлари алгоритми:
1. Рўйхатдан ўтиш тилини танлаш;
2. Авторизациядан ўтиш таклиф этилгандан кейин «авторизация» тугмасини босиш;
3. Хорижда қандай фаолият юритмоқчилигини (жисмоний шахс/юридик шахс сифатида) танлаб, шундан сўнг шахсий кабинетга ўтиш;
4. Шахсий кабинетда «Онлайн хизматлар» бўлимида «Консуллик ҳисобига туриш учун маълумотнома олиш» тугмасини босиш. Мазкур тугма босилганда фуқарога хорижий давлатда ишга жойлашиши тўғрисидаги гувоҳноманинг шакли тақдим этилади;
5. Тақдим этилган шаклда «доимий яшаш жойи» (давлат, шаҳар ва манзил) ҳамда «меҳнат фаолияти тўғрисидаги маълумотлар» (давлат, шаҳар, манзил, корхона номи, лавозими ва касби, меҳнат фаолиятини бошлаган вақти ва ойлик иш ҳақи) деб номланган қаторларни тўлдириш. «Қўшимча маълумотлар» деб номланган қаторга ўзи ҳақидаги қўшимча маълумотларни киритиш мумкин;
6. Юқорида кўрсатилган қаторлар тўлдирилгандан кейин электрон тўлов турини танлаш ва «Қабул қилиш» тугмасини босиш;
7. Рўйхатдан ўтиш учун тўланиши лозим бўлган пул миқдори – 1 ЭКИҲ кўрсатилган саҳифа тақдим этилади. «Давом эттириш» тугмасини босиш ва тақдим этилган майдончаларда рўйхатдан ўтиш учун тўлов амалга ошириладиган пластик картанинг маълумотларини киритиш;
8. Тўлов амалга оширилгандан кейин меҳнат шартномасининг амал қилиш муддатига бериладиган гувоҳноманинг электрон шакли тақдим этилади.
Ҳужжат Қонун ҳужжатлари маълумотлари миллий базасида эълон қилинган ва 28.09.2018 йилдан кучга кирди.
Ленара Хикматова.
