Маъмурий жавобгарлик тўғрисидаги кодекснинг 283-моддасига тегишли қўшимча киритилди (10.09.2019 йилдаги ЎРҚ-566-сон Қонунга қаранг).
Энди депутатлик ва сенаторлик фаолиятининг кафолатлари бузилган тақдирда (МЖТКнинг 193-моддаси) маъмурий ҳуқуқбузарлик тўғрисида баённома тузилмайди. Олий Мажлис палаталари девонлари ҳамда халқ депутатлари маҳаллий Кенгашлари котибиятлари тўғридан-тўғри судга мурожаат қилади. Улар ўзининг аризасида ҳуқуқбузарнинг шахси, маъмурий ҳуқуқбузарлик содир этилган жой, вақт ва бу ҳуқуқбузарликнинг моҳияти ҳақидаги маълумотларни, шунингдек ишни ҳал этиш учун зарур бўлган бошқа маълумотларни кўрсатишлари керак.
Эслатиб ўтамиз, МЖТКнинг 193-моддасига биноан мансабдор шахслар қуйидагилар учун жавобгар бўлади:
- депутатлар ҳамда сенаторлар олдидаги ўз вазифаларини бажармаслик, уларнинг ишига тўсқинлик қилиш, уларга атайлаб сохта маълумот бериш, депутатлик ва сенаторлик фаолиятининг кафолатларини бузиш;
- парламент сўровини, депутат, сенатор сўровини кўриб чиқмасдан қолдириш ёки уларни кўриб чиқиш муддатларини узрли сабабларсиз бузиш ёхуд улар юзасидан била туриб нотўғри маълумотларни қасддан тақдим этиш.
Жарима миқдори БҲМнинг 3 дан 7 бараваригачани ташкил этади.
Қонун “Халқ сўзи” газетасида эълон қилинган ва 12.09.2019 йилдан кучга кирди.
Олег Заманов.
