Энди тадбиркорлик субъектлари «UzASBO» дастурий мажмуаси ёрдамида бюджет ташкилотлари билан тузилган шартномалар ҳолатини текширишлари мумкин. Молия вазирлиги сайтида шу ҳақда хабар берилади.
Мажмуада яратилган модуль қуйидаги имкониятларни беради:
- Давлат электрон харидлари порталида тузилган шартномаларнинг Молия вазирлиги Ғазначилиги томонидан рўйхатга олинганлигини мониторинг қилиш;
- Ҳисоб-китоб-клиринг палатасининг махсус ҳисобварағига бюджет ташкилотлари томонидан тўловлар амалга оширилганлиги ҳақида маълумотлар олиш;
- Ҳисоб-китоб-клиринг палатасининг махсус ҳисобварағидан етказиб берувчига тўловларни амалга ошириш учун киритилган ҳисобварақ-фактуралар ҳолатини назорат қилиш.
Ушбу функциядан фойдаланиш учун юридик шахс номига очилган ЭРИ калити орқали мажмуада рўйхатдан ўтиш зарур.
Дастурий мажмуа манзили: http://new.mdm.uz/uzasbo.
Эслатиб ўтамиз, «UzASBO» дастурий мажмуаси Молия вазирлиги томонидан 2011 йилда фойдаланишга жорий этилган. У бюджет ташкилотлари томонидан бухгалтерия ҳисобини юритиш, шунингдек уларнинг интерактив ҳамкорлигини таъминлашга мўлжалланган.
