ҚҲТБТ порталида Экспорт контрактларини Ўзбекистон Республикаси Ташқи савдо вазирлигида (кейинги ўринларда - ТСВ) рўйхатдан ўтказиш тўғрисидаги низом лойиҳаси жойлаштирилди.
Эслатиб ўтамиз, Президент томонидан 3.11.2017 йилдаги ПФ–5215-сон «Махсус турдаги товарлар экспорти ва импортини лицензиялаш, шунингдек, экспорт контрактларини рўйхатга олиш ва импорт контрактларини экспертизадан ўтказишни тартибга солиш чора-тадбирлари тўғрисида»ги Фармон имзоланган (шарҳ – бу ерда). Фармон доирасида вазирлик ва идораларга тегишли низомлар лойиҳаларини ишлаб чиқиш ва тасдиқлаш топширилган.
Ишлаб чиқилган лойиҳага мувофиқ ТСВда рўйхатдан ўтказилиши лозим бўлган ҳамда рўйхатдан ўтказилмайдиган экспорт контрактлари рўйхати қуйидаги тарзда бўлади:
|
Рўйхатдан ўтказилиши лозим |
Рўйхатдан ўтказилмайди |
|
Ҳукумат қарорлари ва ҳукуматлараро битимлар асосида тузилган контрактлар.
|
Агар чап устундаги контрактлар товар-хом ашё биржаларида тузилган ва рўйхатдан ўтказилган бўлса.
|
|
Президентнинг 3.11.2017 йилдаги ПФ-5215-сон Фармонига иловага киритилган товарлар экспорти учун контрактлар.
Бундай товарлар экспорти лицензияланиши лозим. Лицензияни расмийлаштириш тартиби – бу ерда.
|
Хорижий инвестициялар иштирокидаги ишлаб чиқариш корхоналарининг ўзи ишлаб чиқарган товарлари экспорти учун контрактлар (ПФ-5215-сон Фармонга иловага биноан лицензияланадиган махсус турдаги товарлар экспортидан ташқари). |
|
Илгари ТСВда рўйхатдан ўтказилган экспорт контрактларининг асосий шартларини ўзгартириш тўғрисида қўшимча келишувлар.
|
Чап устунда келтирилган белгиларга мос келмайдиган бошқа контрактлар. |
Экспорт контрактларининг рўйхатдан ўтказилиши қуйидаги талабларнинг бажарилишига боғлиқ бўлади:
1. контракт низомда экспорт контрактлари учун белгиланган барча шартлар ва маълумотларни ўз ичига олиши зарур;
2. рўйхатдан ўтказиш учун ариза топширилган пайтда контракт нархи қуйидаги нарх даражаларидан бирига мувофиқ келиши керак:
- ишлаб чиқарувчи заводлар ёки муқобил етказиб берувчилар ҳамда ишлаб чиқарувчининг дилерлари ва (ёки) дистрибьюторларининг тижорий таклифлари, прайс-варақлари асосида шаклланадиган;
- очиқ ахборот манбаларида кўрсатилган, шу жумладан ахборот материалларида, Интернет тармоғида кўрсатилган.
Рўйхатдан ўтиш учун – ҳужжатлар пакети
Экспорт контрактини рўйхатдан ўтказиш учун қуйидаги ҳужжатлар талаб этилади:
- ариза берувчининг номи, жойлашган жойи (почта манзили) ва ташкилий-ҳуқуқий шакли кўрсатилган белгиланган шакл бўйича ариза;
- контрактнинг харидор ва сотувчи томонидан имзоланган асл нусхаси ва унинг нусхаси;
- контрактнинг қонунчиликка мувофиқлиги юзасидан юридик хулоса;
- контракт ишончнома бўйича тузилган тақдирда ариза берувчи томонидан тасдиқланган ишончнома нусхаси;
- танлов варақаси ёки тасдиқловчи ҳужжатлар (сўровномалар, тижорий таклифлар, биржалар котировкалари, прайс-варақлар, нарх нашрлари ва бошқалар) тақдим этган ҳолда контракт нархини асослаш. Бунда барча таклифлар муқобил таклифларни тақдим этувчи компанияларнинг юридик манзиллари ва боғланиш реквизитларини сақлаши зарур;
- контракт амалга оширилган тақдирда экспорт қилинаётган маҳсулотларнинг рентабеллик даражаси кўрсатилган ҳолда таннархи калькуляцияси;
- агар лицензияланадиган махсус турдаги товарлар экспорт қилинган тақдирда ёки контракт Ҳукуматнинг қарори ва ҳукуматлараро битимлар асосида тузилган бўлса, махсус турдаги товарлар экспорти учун лицензия бериш тўғрисидаги Президент ҳужжати ёки Ҳукумат қарорининг нусхаси.
Контрактни рўйхатдан ўтказиш учун ариза у имзоланган пайтдан бошлаб эътиборан 2 ой ичида тақдим этилиши зарур.
Натижаларга кўра сертификат расмийлаштирилади
ТСВ ариза ва тақдим этилган ҳужжатларни қабул қилинган санадан бошлаб 10 иш куни ичида бунинг учун йиғим ундирмаган ҳолда кўриб чиқади. Кўриб чиқиш натижаларига кўра, контракт рухсат бериш талабларига мувофиқ келган тақдирда ариза берувчиларга идентификация рақами берилиб, берилган сертификатлар реестрига киритилган ҳолда сертификат берилади. Сертификат контрактнинг амал қилиш муддатига берилади.
Лойиҳа ўзгартирилиши, тўлдирилиши ёки рад этилиши мумкин.
Ленара Хикматова.
