.jpg)
«Ўзбекистон Республикасининг Маъмурий жавобгарлик тўғрисидаги кодексига қўшимча киритиш тўғрисида»ги қонун лойиҳаси муҳокамага қўйилди.
Хусусан, реклама тарқатишда давлат тилига доир талабларга амал қилмаганлик учун маъмурий жавобгарлик ўрнатиш режалаштирилмоқда – БҲМнинг 5 бараваридан 7 бараваригача жарима (бугунги кунда 1,6 млн сўмдан 2,3 млн сўмгача).
Маълумот: реклама тили бўйича қуйидаги талаблар ўрнатилган:
1) республика ҳудудида реклама давлат тилида тарқатилади;
2) реклама мазмунининг таржимаси қуйидаги талабларга риоя этилган ҳолда бошқа тилларда такрор берилиши мумкин:
– реклама мазмунининг бошқа тиллардаги таржимаси матни унинг давлат тилидаги асосий маъносини бузиб кўрсатмаслиги керак;
– ташқи реклама орқали жойлаштириладиган рекламанинг бошқа тиллардаги таржимаси матни давлат тилидаги реклама матнининг пастки қисмида горизонтал ҳолда жойлаштирилиши ва умумий реклама майдонининг 40 %дан ошмаслиги керак;
– рекламанинг бошқа тиллардаги таржимаси матни ҳарфининг ўлчами давлат тилидаги реклама матни ҳарфининг ўлчамидан кичик бўлиши керак;
– телевидение ва радиоканалларда, шунингдек босма нашрларда тарқатиладиган рекламанинг бошқа тиллардаги таржимаси ҳар кунги умумий реклама ҳажмининг 20 %дан ошмаслиги керак.
Юқоридаги талаблар қуйидаги ҳолларга татбиқ этилмайди:
– фақат чет тилларда эълон қилинадиган босма нашрларда ва ноширлик маҳсулотининг бошқа турларида жойлаштириладиган рекламага;
– кўрсатувни (эшиттиришни) чет тилларда амалга оширувчи оммавий ахборот воситаларининг телевидение, радио, видео, кинохроникал дастурларини намойиш этиш (эшиттириш) жараёнида жойлаштириладиган рекламага;
– Интернет жаҳон ахборот тармоғидаги материалларни фақат чет тилларда жойлаштирадиган веб-сайтларнинг ахборот ресурсларига жойлаштириладиган рекламага.
Лойиҳа ўзгартирилиши, тўлдирилиши ёки рад этилиши мумкин.
Собир Нурбердиев.
