Адлия вазирлиги томонидан «Тадбиркорлик кодекси» лойиҳаси ишлаб чиқилди ва жамоатчилик муҳокамасига қўйилди.
Кодекс лойиҳасида 9 та амалдаги қонун, 2 та янги қонун лойиҳаси ва 10 дан ортиқ норматив-ҳуқуқий ҳужжатлар бирлаштирилди. Улар тадбиркорлик фаолиятини ташкил этишдан бошлаб, уни тугатишгача бўлган барча жараёнларни тартибга солишга қаратилган.
«Тадбиркорлик кодекси» лойиҳасида қуйидагилар назарда тутилмоқда:
- хўжалик юритувчи субъектларни кичик, ўрта ва йирик тоифаларга ажратиш;
- хўжалик юритувчи субъектларнинг ташкилий-ҳуқуқий шакллари базасини ихчамлаштириш, «хўжалик ширкати» ташкилий-ҳуқуқий шаклини бекор қилиш;
- якка тартибдаги тадбиркорлар шуғулланиши мумкин бўлмаган фаолият турларини белгилаш. Уларга қонунчиликда тақиқланмаган ҳар қандай фаолиятни амалга ошириш ҳуқуқи берилади;
- тадбиркорликни давлат томонидан тартибга солишнинг чегаралари ҳамда тартибга солиш шаклларини белгилаш;
- 43 та давлат органининг 146 та назорат функциялари ва Бизнес-омбудсманни хабардор этиш тартибида ўтказиладиган 18 турдаги текширувлар рўйхатларини тасдиқлаш ва бошқалар.
Лойиҳа ўзгартирилиши, унга қўшимча киритилиши ёки рад этилиши мумкин.
