Соғлиқни сақлаш вазирининг 31.08.2023 йилдаги 3455-сон буйруғи билан асосий дори воситалари рўйхати (АДВР) тасдиқланди.
АДВР Ўзбекистон ҳудудида амал қиладиган фармакотерапевтик таснифлаш асосида Ўзбекистон Республикасининг асосий дори воситалари ва тиббиёт буюмлари рўйхатини тузиш бўйича услубий кўрсатмаларга мувофиқ шакллантирилган.
Мазкур рўйхатдан тиббиёт муассасаларининг эҳтиёжларини таҳлил қилиш, харидларни оқилона ташкил этиш, ходимларни улардан фойдаланишга ўргатиш, маҳаллий фармацевтика корхоналари томонидан уларнинг ишлаб чиқарилишини рағбатлантириш, асосий дори воситалари мавжудлигини назорат қилиш ва улар нархини шакллантиришда фойдаланилади.
Дори воситалари халқаро патентланмаган номи, дозаси ва ишлаб чиқарилган шакли кўрсатилган ҳолда рўйхатга киритилган. Дори воситалари халқаро патентланмаган номга эга бўлмаган тақдирда, унинг ўрнини босувчи ном ёки таркиб кўрсатилади.
Янги рўйхатга дори воситаларининг 65 та гуруҳи киритилган.
Ҳужжат Қонун ҳужжатлари маълумотлари миллий базасида эълон қилинган ва 04.09.2023 йилдан кучга кирди.
Лола Абдуазимова
