Иқтисодиёт ва молия вазирининг буйруғи (05.06.2025 й. АВ рўйхат рақами 2606-9-сон) билан Йўловчи божхона декларациясини тўлдириш ва расмийлаштириш тартиби тўғрисидаги йўриқноманинг (05.08.2014 й. АВ рўйхат рақами 2606-сон) иловасига ўзгартиришлар киритилди, улар кейинги ойдан эътиборан кучга киради.
Хусусан, шахсий эҳтиёж учун олиб кирилаётган товарлар қиймати камайтирилди:
- халқаро аэропортлар орқали – 2000 АҚШ долларидан 1000 АҚШ долларигача;
- темир йўл ва дарё божхона чегаралари орқали – 1000 АҚШ долларидан 500 АҚШ долларигача.
Қиймати 2000 доллардан ошмайдиган 65 грамм заргарлик буюмларини олиб кириш бўйича амалдаги чекловлар бекор қилинди.
Олиб кирилаётган товарлар ҳажми бўйича чекловлар аниқлаштирилди:
- атир ва ифор таратувчи сувлар – 3 дона (лекин 300 мл дан ошмаган);
- тамаки маҳсулотлари: амалдаги қоидалар бўйича 10 қути ўрнига чеклов киритилади: 200 дона сигарет, 5 дона сигара ва тамаки – 100 гр.
Бундан ташқари киритилган қўшимчага асосан божсиз олиб кириш нормалари қўлланилмайди, агар товарларни нотижорат мақсадларда олиб кираётган шахс хорижий давлат ҳудудида:
– темир йўл, дарё ва автомобиль ўтказиш пунктлари орқали 2 календарь кундан кам муддат бўлган;
– халқаро аэропортлар орқали 3 календарь кундан кам муддат бўлган;
– бир календарь ой давомида уч ва ундан ортиқ маротаба бўлганда.
Ҳужжат Қонун ҳужжатлари маълумотлари миллий базасида эълон қилинган ва 02.07.2025 йилдан кучга киради.
Лола Абдуазимова
