Президентнинг 20.06.2022 йилдаги “Дзюдо спорт турини янада ривожлантириш чора-тадбирлари тўғрисида”ги ПҚ-286-сон қарори қабул қилинди.
Дзюдо спорт турини ривожлантиришнинг асосий йўналишлари:
- дзюдони аҳоли ўртасида оммавий спорт турларидан бирига айлантириш, иқтидорли спортчиларни аниқлаш, танлаш ва саралаш ҳамда уларни профессионал спортчилар сифатида тайёрлашнинг янги тизимини йўлга қўйиш;
- мактабгача ёшдаги болаларда дзюдога қизиқиш уйғотиш ва жанг санъатининг ушбу тури бўйича бошланғич кўникмаларни шакллантириш;
- дзюдо бўйича профессионал тренерлар, малакали ҳакамлар ва мутахассисларни тайёрлаш тизимини ривожлантириш, ўқув-услубий қўлланмалар ишлаб чиқиш;
- дзюдо инфратузилмасини янада ривожлантириш ҳамда халқаро талабларга мослаштириш, умумий ўрта таълим мактабларида дзюдо заллари сонини кўпайтириш;
- Қуролли Кучлар ва ҳуқуқни муҳофаза қилиш органларининг жисмоний тайёргарлик машғулотлари дастурига дзюдони босқичма-босқич киритиш, улар тизимидаги таълим муассасалари ўқувчи-талабалари учун ушбу спорт тури бўйича факультатив машғулотлар ва тўгараклар ташкил қилиш.
2023 йил 1 январдан бошлаб анъанавий тарзда дзюдо спорт тури бўйича Ўзбекистонда қуйидаги мусобақалар ўтказилади:
- катталар ўртасида "Катта дубулға" халқаро турнири;
- Осиё чемпионати ғолиби ва Халқаро тоифадаги Ўзбекистон спорт устаси Учқун Муродов хотирасига бағишланган 18 ёшгача бўлган ўғил болалар ва қизлар ўртасида халқаро турнир;
- умумий ўрта таълим мактаблари ўқувчилари ўртасида "Халқ таълими вазири кубоги";
- ўрта махсус, профессионал ва олий таълим муассасалари ўқувчи-талабалари ўртасида "Олий ва ўрта махсус таълим вазири кубоги";
- Қуролли Кучлар тизимида "Мудофаа вазири кубоги";
- 2024-2025 йилларда ҳарбийлар ўртасида Жаҳон чемпионати.
Сурхондарё вилояти Денов тумани ҳамда Хоразм вилояти Урганч шаҳар олимпия ва миллий спорт турларига ихтисослаштирилган давлат мактаб-интернатлари негизида Денов ҳамда Урганч дзюдо спорт маҳорати мактаблари ташкил этилади.
Дзюдо мактабларида миллий терма жамоаларга ёш спортчиларни танлаб олиш ва тайёрлаш амалга оширилади. Ўқишга 5-синфдан қабул қилинади ҳамда таълим олиш муддати етти йил этиб белгиланади.
Шу билан бир қаторда, 2023 йил 1 январдан бошлаб:
- умумий ўрта таълим мактабларида дзюдо спорт турини ривожлантириш бўйича "Болалар учун дзюдо" дастурини;
- мактабгача таълим ташкилотларида "Мактабгача дзюдо" лойиҳасини жорий қилиш топширилди.
Қуйидагилар тасдиқланди:
- 2022-2023 йилларда дзюдо спорт турини янада ривожлантириш бўйича "йўл харитаси";
- 2022-2025 йилларда дзюдо спорт турини ривожлантиришнинг мақсадли кўрсаткичлари.
Ҳужжат Қонун ҳужжатлари маълумотлари миллий базасида эълон қилинган ва 20.06.2022 йилдан кучга кирди.
Лола Абдуазимова.
