Вазирлар Маҳкамасининг 06.11.2025 йилдаги 700-сон қарори билан қуйидагилар тасдиқланди:
- Божхона назорати шаклларини қўллаш тартиби тўғрисидаги низом;
- Божхона аудитини ўтказиш тартиби тўғрисидаги низом;
- Халқаро почта ва курьерлик жўнатмаларини божхона назорати ва расмийлаштирувидан ўтказиш тартиби тўғрисидаги низом.
Божхона назорати шаклларини қўллаш тартиби тўғрисидаги низомга мувофиқ почта ва курьерлик жўнатмаларида юбориладиган ва божхона чегараси орқали олиб ўтиладиган товарлар мажбурий божхона назоратидан ўтказилиши лозим.
Почта алоқаси оператори ва экспресс-ташувчи почта ва курьерлик жўнатмаларини божхона кўздан кечируви ҳамда божхона кўригидан ўтказиш учун божхона органларига тақдим этади.
Мазкур жўнатмалар орқали олиб кириладиган ва жўнатиладиган товарлар белгиланган божхона постигача божхона транзити шартларига риоя этилган ҳолда етказиб берилади.
Жўнатмаларни ташиш, ортиш (қайта ортиш), тушириш, сақлаш ва шунга ўхшаш бошқа юк операциялари чоғида юзага келадиган харажатлар почта алоқаси оператори ёки экспресс-ташувчи маблағлари ҳисобидан қопланади.
Почта ва курьерлик жўнатмалари устидан божхона назорати божхона органлари томонидан "қизил," "сариқ" ва "яшил" йўлаклар бўйича рўйхатга олинган Жўнатмалар декларацияси асосида хавфни бошқариш тизимини қўллаган ҳолда амалга оширилади.
Шунингдек, ҳужжат билан бир қатор норматив-ҳуқуқий ҳужжатларга қуйидаги янгиликларни назарда тутувчи ўзгартириш ва қўшимчалар киритилди:
- рақамли маркировкаланадиган товарларни эркин муомалага чиқариш божхона режимига расмийлаштиришда, маркировкалаш шарти билан шартли чиқариш божхона режимига расмийлаштиришга рухсат берилади;
- товарларни вақтинча олиб киришда божхона божлари ва солиқларни тўлашдан шартли озод қилишнинг аниқ муддатлари белгиланди;
- жисмоний шахслар томонидан божхона чегараси орқали дори воситалари, тиббий буюмлар ва биологик фаол қўшимчаларни олиб ўтиш тартиби такомиллаштирилди;
- божхона тўғрисидаги қонунчилик талаблари ўртасида вужудга келган номувофиқликлар ҳамда ноаниқликлар бартараф этилди.
Ҳужжат Қонун ҳужжатлари маълумотлари миллий базасида эълон қилинган ва 08.02.2026 йилдан кучга киради.
Лола Абдуазимова
