Президентнинг 27.12.2024 йилдаги "Ўзбекистон Республикаси Президентининг айрим фармонларига ўзгартириш ва қўшимчалар киритиш тўғрисида"ги ПФ-227-сонли Фармони қабул қилинди.
Шундай қилиб, 5-тоифага киритилган туманларда рўйхатдан ўтган ва фаолият юритаётган тадбиркорлик субъектлари юридик шахсларнинг мол-мулк солиғи ва ер солиғини – ушбу солиқлар бўйича ҳисобланган сумманинг 50% миқдоридаги солиқ ставкаси бўйича тўлайдилар. Йирик солиқ тўловчилар, доимий муассасалар, бюджет ташкилотлари ва давлат корхоналари, шунингдек устав фондида (капиталида) давлат улуши 50% ва ундан юқори бўлган юридик шахслар бундан мустасно. Тегишли ўзгартириш 30.12.2022 йилдаги ПФ-287-сонли Фармонга киритилди.
18.09.2024 йилдаги ПФ-140-сонли Фармоннинг 2-банди янги таҳрирда баён этилди, унга кўра:
- 2025 йил 1 январдан янги боғлар, узумзорлар ва тутзорлар барпо этилган ер участкалари учун юридик шахслардан олинадиган ер солиғини тўлашдан озод қилиш шаклидаги имтиёз бекор қилинади, шунингдек ушбу ерлар бўйича солиқ ставкаси 50%га камайтирилади;
- 2025 йил 1 июлдан ягона тарифлар бўйича йўловчиларни ташиш хизматлари айланмаси учун қўшилган қиймат солиғи бўйича имтиёз бекор қилинади.
Янги боғлар ташаббускорлари 2028 йил 1 январгача хорижий давлатлардан мевали кўчатлар пайвандтаглари, пайвандустлар, она материали ва техникани импорт қилишда ҚҚС ва божхона божидан озод қилинади. Ўзгартиришлар 30.09.2024 йилдаги ПФ-151-сонли Фармоннинг 10-банди 3-хатбошисига киритилди.
Ҳар икки йилда бир марта май ойининг учинчи ҳафтасида ўтказиладиган Халқаро мода ҳафтаси ("Silk Uzbekistan Fashion Week") мукофот жамғармаси 1 млн долларгача камайтирилди. Ўзгартириш 12.01.2024 йилдаги ПФ-9-сонли Фармонга киритилди.
Ҳужжат Қонунчилик маълумотлари миллий базасида эълон қилинди ва 28.12.2024 й. кучга кирди.
Саодат Усмонова
