Кўчмас мулк ва автога доир битимларни 1 мартдан расмийлаштирган фойдалироқ бўлади

Вазирлар Маҳкамасининг 15.02.2018 йилдаги 123-сон қарори билан нотариал ҳаракатларни амалга оширганлик учун ундириладиган давлат божи ставкалари ўзгартирилди. Мазкур шарҳда кўчмас мулк ва автотранспорт воситаларига доир битимларни, шунингдек тегишли ишончномаларни нотариал расмийлаштирганлик учун янги ставкалар келтирилган.

Кўчмас мулкка доир битимлар ва ишончномалар бўйича ставкалар

1. Кўчмас мол-мулкнинг олди-сотди, ҳадя ва айирбошлаш шартномаларини тасдиқлаганлик учун давлат божи мулкнинг жойлашган жойига қараб белгиланади (қуйидаги келтирилган жадвалга қаранг).

* жадвалда кўрсатилган ставкалар мижознинг Тошкент шаҳрида доимий пропискаси мавжуд бўлгандагина қўлланилади. Бошқа ҳолда 2017 йил июлдан амалга киритилган шартлар ва давлат божи ставкалари қўлланилади.

Мулкдорнинг хотинига (эрига), унинг ва хотинининг (эрининг) ота-оналарига, болалари ва уларнинг эр-хотинларига, набираларига, бувиларига, буваларига, ака-укалари ва опа-сингилларига кўчмас мол-мулкни ўтказиш билан боғлиқ шартномалар расмийлаштирилаётганда давлат божи белгиланган ставканинг 50%и миқдорида ундирилади.

2. Кўчмас мулкни тасарруф қилиш ҳуқуқини берувчи ишончномаларни тасдиқлаганлик учун давлат божи қуйидаги миқдорларда ундирилади:

• мулкдорнинг хотинига (эрига), унинг ва хотинининг (эрининг) ота-оналарига, болалари ва уларнинг эр-хотинларига, набираларига, бувиларига, буваларига, ака-укалари ва опа-сингилларига – ЭКИҲнинг 25%и миқдорида;
• бошқа шахсларга – ЭКИҲнинг 50%и миқдорида.

Автомототранспортга доир битимлар ва ишончномалар бўйича ставкалар 

1. Автомототранспорт воситаларини бошқа шахсга ўтказиш шартномаларини тасдиқлаганлик учун давлат божи ставкалари 2-5 баравар пасайтирилди (қуйида келтирилган жадвалга қаранг). Улар қаерда ишлаб чиқарилганидан (маҳаллий ёки хорижий) қатъи назар бир хил миқдорда қўлланилади (ҳозир хорижий автотранспортларга доир битимлар бўйича ставка 2-3 баравар юқори).

Бунда қуйидаги шартномаларни расмийлаштиришда амалдаги имтиёзли ставкалар сақланиб қолади:

• мулкдорнинг хотинига (эрига), унинг ва хотинининг (эрининг) ота-оналарига, болалари ва уларнинг эр-хотинларига, набираларига, бувиларига, буваларига, ака-укалари ва опа-сингилларига автомототранспорт воситаларини ўтказиш шартномалари расмийлаштирилаётганда давлат божи белгиланган ставканинг 5%и миқдорида ундирилади;
• банк кредитлари ҳисобига сотиб олинадиган автомототранспорт воситаларининг олди-сотдиси учун давлат божи белгиланган ставканинг 10%и миқдорида ундирилади;
• ЙТҲ натижасида шикастланган автомототранспорт воситаларини бошқа шахсга ўтказиш шартномалари, -  давлат божи миқдори шу транспорт воситалари яроқлилигининг қолдиқ фоизига қараб ўзгартирилади.

2. Автомототранспорт воситаларини бошқариш ва тасарруф қилиш ҳуқуқини берувчи ишончномаларни, шунингдек улардан текин фойдаланиш шартномаларини нотариал тасдиқлаганлик учун ставкалар 1,7 баравар пасайтирилди ва қуйидаги миқдорларни ташкил қилди:

• мулкдорнинг хотинига (эрига), унинг ва хотинининг (эрининг) ота-оналарига, болалари ва уларнинг эр-хотинларига, набираларига, бувиларига, буваларига, ака-укалари ва опа-сингилларига, жиянларига – ЭКИҲнинг 50%и;
• бошқа шахсларга – ЭКИҲнинг 3 баравари.

Ҳужжат Қонун ҳужжатлари маълумотлари миллий базасида эълон қилинган. Давлат божининг янги ставкалари 1.03.2018 йилдан татбиқ этилади. 

Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.

Олег Заманов.