Вазирлар Маҳкамасининг 20.11.2023 йилдаги «Йилнинг энг намунали маҳалла ёшлар етакчиси» танловини ташкил этиш чора-тадбирлари тўғрисида»ги 608-сон қарори қабул қилинди.
Ҳужжат билан Танловни ташкил этиш тўғрисидаги низом тасдиқланди. Унга асосан, танлов ҳар йили 10 та йўналиш бўйича ўтказилади. Танловда амалий иш тажрибасига эга ва маҳалладаги ёшлар етакчиси лавозимида камида битта маҳаллада олти ой давомида фаолият юритаётган ёшлар етакчилари иштирок этишлари мумкин.
Ҳар йили 5 сентябрга кадар Ёшлар ишлари агентлигининг расмий сайти ва ижтимоий тармоқлардаги саҳифаларида танлов ўтказилиши тўғрисида эълон берилади.
Рўйхатдан ўтиш ҳар йили 5 сентябрда бошланиб, 30 сентябрь куни якунланади.
Танловнинг босқичлари қуйидаги тарзда ўтказилади:
- туман (шаҳар) саралаш босқичи – октябрь ойида;
- ҳудудий саралаш босқичи – ноябрь ойида;
- республика финал босқичи – декабрь ойининг биринчи ўн кунлигида.
Республика финал босқичи ғолиблари қуйидаги имтиёзларга эга бўладилар:
- юқори лавозимга тайинлаш учун кадрлар захирасига киритиш;
- ривожланган хорижий давлатларнинг соҳага оид таълим ташкилотларига малака оширишга юбориш.
Бундан ташқари, улар «Маҳалла ифтихори» кўкрак нишони билан тақдирлашга тавсия этилади.
Шунингдек, ҳужжат билан қуйидагилар тасдиқланди:
- танлов Ташкилий қўмитасининг таркиби;
- танловнинг туман (шаҳар) ва ҳудудий босқичларини ташкил этиш ва ўтказиш бўйича комиссияларнинг намунавий таркиблари.
Ҳужжат Қонун ҳужжатлари маълумотлари миллий базасида эълон қилинган ва 21.11.2023 йилдан кучга кирди.
Лола Абдуазимова.
