Иккинчи жаҳон уруши қатнашчиларига пул мукофоти миқдори белгиланди, шунингдек Хотира ва Қадрлаш кунига бағишланган тадбирларга тайёргарлик кўриш ва уни ўтказиш дастури тасдиқланди .
Президентнинг 4.04.2017 йилдаги «Иккинчи жаҳон уруши қатнашчиларини рағбатлантириш тўғрисида»ги Фармони билан 1941-1945 йиллардаги Иккинчи жаҳон уруши қатнашчилари ва ногиронларига 2 миллион сўм миқдорида бир марталик пул мукофоти белгиланди.
Бундан ташқари, Президентнинг 4.04.2017 йилдаги «Хотира ва Қадрлаш кунига тайёргарлик кўриш ва уни ўтказиш чора-тадбирлари тўғрисида»ги Қарори билан тадбирларга тайёргарлик кўриш ва уни ўтказиш дастури маъқулланди.
Ишчи гуруҳга қуйидагилар топширилди:
- дастурда назарда тутилган тадбирларни “Қаҳрамонлик, бурч ва фидойилик” ҳамда “Аждодларни хотирлаш – муқаддас қадрият” шиорлари остида юқори савияда ўтказишни ташкил этиш;
- Дастур тадбирларининг сифатли ўтказилишини таъминласин ва жойларга чиқиб, тадбирларга тайёргарлик кўриш ва уни ўтказишга амалий ёрдам кўрсатиш
- Иккинчи жаҳон урушининг ҳар бир қатнашчисига, фронт орти меҳнат фахрийларига, Мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилувчи орган ходимларининг оила аъзоларига моддий, маънавий ва бошқа турдаги ёрдамлар кўрсатиш мақсадида тегишли вазирлик ва идоралар, ташкилот ва ҳарбий қисмлар вакилларини бириктириш ҳамда ушбу тоифадаги шахсларни қутлаш ва кўнглини кўтариш мақсадида уларнинг яшаш жойига раҳбарларнинг ташрифини ташкил этиш;
- ёлғиз ва кам таъминланган Иккинчи жаҳон уруши қатнашчилари турар жойи ва уй хўжаликларини таъмирлаш, ободонлаштириш ҳамда ўз уй-жойига эга бўлмаганларига турар жой ажратиш бўйича тегишли чора-тадбирларни амалга ошириш;
- Хотира ва Қадрлаш кунига тайёргарлик кўриш давомида Иккинчи жаҳон уруши ва фронт орти меҳнат фахрийлари, Мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилувчи орган ходимлари кўрсатган матонати, мардлик ва жасорати аҳамиятини кенг аҳоли қатлами, айниқса, ёшлар ўртасида тушунтириш, тарғиб ва ташвиқ этиш бўйича маданий-маърифий ва ватанпарварлик йўналишидаги тадбирлар ўтказилишини ташкил қилиш;
- 1941-1945 йиллардаги Иккинчи жаҳон уруши қатнашчилари ва ногиронларига Президент номидан бир марталик пул мукофотини тантанали равишда топшириш.
Шу билан бирга, вилоят, шаҳар ва туманларда комплекс чора-тадбирлар ишлаб чиқилади ва амалга оширилади, жумладан, Иккинчи жаҳон уруши вақтидаги композициялар инсталляцияси, уруш йиллари қўшиқ ва мусиқалари, дастурхон тузаш ва тегишли шароитлар яратиш билан боғлиқ тадбирлар ташкил этилади. Кўча ва майдонлар Хотира ва Қадрлаш кунига бағишланган плакат ва стендлар билан безалади.
Пойтахтимизда 2017 йил 9 май куни соат 21.00 да байрам салюти ўтказилади.
Мазкур ҳужжатнинг матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Олег ЗАМАНОВ,
экспертимиз.
.png)
