Президент 17.08.2018 йилда «Тошкент шаҳрида бошқарувнинг алоҳида тартибини жорий этиш бўйича ҳуқуқий эксперимент тўғрисида»ги Фармонни имзолади. Ҳужжат матнини ЎзА эълон қилди.
Пойтахт ҳокимига жорий йил 1 октябрга қадар муддатда Тошкентнинг бош режаси концепцияси ва бош режа лойиҳаларини ишлаб чиқиш бўйича халқаро танлов ўтказилишини таъминлаш вазифаси топширилди. Тошкент шаҳар ҳокими девони – концепцияни ишлаб чиқиш бўйича буюртмачи. Молиялаштириш манбалари – Давлат бюджети ва тадбиркорлик субъектларининг давлат-хусусий шериклик шартларида жалб этиладиган маблағлари.
Қуйидаги муддатлар белгиланди:
- 2019 йил 1 январга қадар Тошкент шаҳрининг бош режаси концепциясини тасдиқлаш тўғрисидаги Президент қарори лойиҳасини;
- 2019 йил 1 декабрга қадар тасдиқланган концепция асосида – Тошкент шаҳрининг бош режасини тасдиқлаш тўғрисидаги Президент қарори лойиҳасини Вазирлар Маҳкамасига киритиш.
! Муҳим жиҳати шундаки, пойтахтнинг бош режаси тасдиқлангунга ва уни архитектура жиҳатидан ривожлантиришнинг истиқболлари аниқ белгилангунга қадар:
- Тошкент шаҳрининг эски шаҳар қисмида бузиш, реконструкция қилиш ва капитал қурилиш бўйича ишларни олиб бориш тақиқланади (Фармонда аниқ чегаралар белгиланмаган – таҳр.);
- Тошкент шаҳрининг бошқа туманларида янги турар жой массивларини қуришда ижтимоий объектларни комплекс жойлаштириш ва муҳандислик-коммуникация тармоқларини кенгайтириш мажбурий тартибда назарда тутилади.
Олег Заманов.